Vedat Muriqi dalë ngadalë po hyn në histori të Mallorcas.
Futbollisti kosovar është duke shkëlqyer në kampionatin spanjoll në sezonin e tij të tretë.
Fillimisht, para dy sezonesh i kaloi gjashtë muaj huazimi në ekipin ishullor, të cilin e ndihmoi të mbetej në ligën elitare.
Më pas, në edicionin e kaluar ishte njëri prej golashënuesve më të mirë të La Ligas me 15 gola, duke qenë përsëri shpëtim për Mallorcan.
E “Pirati” e ka rikthyer formën në këtë sezon pasi paraprakisht nuk shënoi në katër xhirot e para, ndërsa në tri ndeshjet e fundit realizoi vazhdimisht.
Me këta tre gola, prizrenasi arriti në kuotën e 23 golave të shënuar për Mallorcën, duke e kaluar ish-futbollistin e këtij klubi, Nadal.
Aktualisht, përfaqësuesi kosovar e ndan pozitën e tetë së bashku me ish-lojtarët e klubit, Magdaleno, Aduriz e Chory Castro.
Por, nëse vazhdon me këtë ritëm, ish-futbollisti i Fenerbahçes mund të ngritet në pozitat e para.
Për shembull, vetëm një gol më shumë se Muriqi e kishte shënuar sulmuesi i dikurshëm Luque, respektivisht 24 gola në 73 ndeshje për Mallorcën.
Ibagaza i kishte realizuar 25 gola, pra dy më shumë se sulmuesi kosovar, kurse kamerunasi Webo është i pesti në listë me 27 gola.
Në pozitën e katërt është Guiza, i cili i ka realizuar 28 gola në total, ndërsa në sezonin 2007/08 e kishte fituar çmimin “Pichichi” me 27 gola.
Pra, Muriqit i nevojiten vetëm edhe 5 gola për ta ndarë vendin e katërt me Guizan.
Ndërkaq, pak më larg është Victor, me 37 gola të shënuar, që e zë vendin e tretë.
Venezuelasit Arango, që kishte luajtur për Mallorcën në fillim-vitet e 2000-ta, i takon vendi i dytë me 45 gola.
Ndërkaq, lider absolut tek Mallorca, me një rekord vështirë të thyeshëm, mbetet legjenda kamerunase, Samuel Eto’o.
Ish-futbollisti i Real Madridit dhe i Barcelonës i kishte shënuar 54 gola në periudhën 2000-2004.