Analisti politik Arton Muhaxheri ka bërë të ditur për TV Arberia se balotazhi i zgjedhjeve lokale nuk pritet të sjellë ndryshime të mëdha, veçanërisht në komunat më të mëdha të vendit.
“Të gjithë indikatorët, që nga koha e fushatës së rregullt e deri te ajo e balotazhit, përfshirë organizimin e strukturave të partive politike dhe prezantimin e platformave programore, tregojnë se zgjedhjet e balotazhit nuk pritet të sjellin ndonjë befasi, sidomos jo në qytetet e mëdha”, ka deklaruar Muhaxheri.
Sipas tij, qytetet kryesore pritet të mbeten nën drejtimin e partive që kanë fituar në raundin e parë:
Prizreni do t’i mbetet PDK-së.
Mitrovica gjithashtu do të vazhdojë të qeveriset nga PDK-ja.
Prishtina dhe Peja pritet të vazhdojnë të qeverisen nga LDK-ja.
Muhaxheri ka dhënë edhe një këshillë për qytetarët për mënyrën e votimit në balotazh
“Qytetarët duhet ta analizojnë mirë situatën dhe, para se ta hedhin votën, të mendojnë për kandidatin i cili vjen nga partia që ka marrë më së shumti vota edhe në Asamble. Për shembull, në Mitrovicë, ku PDK-ja ka dalë fituese e zgjedhjeve si parti, pse të mos votohet Arian Tahiri për kryetar? Në këtë mënyrë, do të kemi më pak probleme në konstituimin e Asambleseve komunale dhe në krijimin e koalicioneve ndërmjet partive”.
Muhaxheri thekson se vota e zgjedhësve mund të ndikojë në stabilitetin politik dhe funksionimin e administratës lokale pas balotazhit.