Ministria e Shëndetësisë ka miratuar kohë më parë Planin e Veprimit për përcaktimin e kritereve për regjistrin e banorëve në Kujdesin Parësor Shëndetësor.
Përmes një komunikate për media, ministria ka bërë të ditur se qëllimi i këtij plani është që secili qytetar të ketë mundësinë që të përzgjedh mjekun familjar brenda zonës së banimit dhe të ketë qasje në shërbimet shëndetësore në kohën e duhur e sipas kërkesës.
Tutje, MSh ka thënë se përmes përzgjedhjes së mjekut familjar do të krijohet lista e banorëve/pacientëve dhe “kjo do të kontribuojë në rritjen e mbulueshmërisë së popullatës me shërbime shëndetësore”.
“Rrjedhimisht, kjo do të ndikojë edhe në promovimin, edukimin dhe parandalimin e sëmundjeve të ndryshme, ngritjen e vetëdijes së qytetarëve për shërbimet që ofrohen në Kujdesin Parësor Shëndetësor”, thuhet në njoftimin për media.
Tutje, ministria ka deklaruar se plani e thekson rëndësinë e përzgjedhjes së mjekut familjar për ruajtjen dhe përcjelljen e shëndetit të qytetarëve në vazhdimësi dhe përfitimet e qytetarëve nga ky proces.
“Fillimisht, procesi do të pilotohet në katër komuna: Lipjan, Istog, Prizren dhe Prishtinë (QMF-5- Ulpianë dhe QMF-6- Bregu i Dellit), për të vazhduar pastaj shtrirjen në tërë vendin”, thuhet mes tjerash.
“Ministria do të ju mbajë të informuar për hapat e mëtejmë në procesin e përzgjedhjes së mjekut familjar brenda zonës suaj të banimit dhe ecurinë e mëtejme”, përfundon njoftimi.
/TV Arbëria
