Një mjek paralajmëron se larja e dhëmbëve në kohën e gabuar mund të dëmtojë smaltin dhe mishrat e dhëmbëve, duke rritur rrezikun për probleme serioze orale.
Dr. Suraj Kukadia shpjegon se momenti i duhur për të larë dhëmbët në mëngjes është para mëngjesit, jo pas tij. Sipas tij, fluori në pastën e dhëmbëve krijon një shtresë mbrojtëse që ndihmon dhëmbët të përballojnë acidet nga ushqimet dhe pijet që konsumohen më pas.
Ai thekson se nëse i lani dhëmbët menjëherë pas mëngjesit, sidomos pas pijeve acidike si lëngu i portokallit, acidi përhapet mbi sipërfaqen e dhëmbëve dhe mund të konsumojë smaltin, duke dëmtuar edhe mishrat e dhëmbëve.
Rekomandimi është i qartë: dhëmbët duhet të lahen dy herë në ditë – para mëngjesit dhe para gjumit. Ndërsa pas ngrënies, është më mirë të shpëlani gojën me ujë për të larguar mbetjet dhe acidet.
Edhe dentistja Dr. Deepa Chopra mbështet këtë këshillë, duke shtuar se larja e dhëmbëve menjëherë pas ushqimit mund të jetë e dëmshme, pasi smalti zbutet përkohësisht nga acidet dhe bëhet më i ndjeshëm ndaj konsumimit. Ajo rekomandon të pritet rreth 30 minuta pas ngrënies përpara se të përdoret furça e dhëmbëve.
Për një shëndet oral të mirë, ekspertët këshillojnë gjithashtu larjen e dhëmbëve dy herë në ditë, pastrimin ndërmjet tyre, kufizimin e sheqerit, shmangien e duhanit dhe alkoolit, si dhe kontrolle të rregullta te dentisti.