Kordinatorja e Vetëvendosjes Dejona Mihajli i ka reaguar kryetarit të LDK-së për deklaratat që ky i fundit i bëri gjatë të martës, ku Mihajli e akuzoi Abdixhikun që nuk e ka thënë të vërtetën e plotë.
“E vërteta duhet të thuhet e plotë. Se nuk bën me përmend Atdheun dhe Zotin kur nuk e thua të gjithë të vërtetën. Prej vjeshtës së vitit 2024 brenda LDK, grupi të saj parlamentar nuk është vërejtur kurrfarë nxitimi, angazhimi, meraku, këmbëngulje e mbi të gjitha kurrfarë votimi, për çështjen e Buxhetit 2025 të Prishtinës. E njëjta frymë mbizotëroi dhe këtë vit në të njëjtën kohë”, ka shkruar ajo.
“Deputetët e LDK-së përfshirë kryetarin kanë dërguar dhjetra çështje në gjykatë kushtetuese, kanë thirrur seanca të jashtëzakonshme me përbalt qeverinë, por kurrë, asnjëherë nuk e kanë bë një hap për buxhetin e prapambetur të Prishtinës. Nuk po flasim as për Gjilanin apo Zubin Potokun, e për RTK-në se për të as në mend nuk ju shkon a ka njerëz të gjallë apo jo në to. Njëjtë PDK e Bedri Hamzës e Uran Ismajlit. Njëjtë AAK. Njëjtë NISMA”, ka shkruar ndër të tjera Mihajli.
Kreu i LDK-së, Lumir Abdixhiku, reagoi ashpër ndaj deklarimeve të presidentes Vjosa Osmani, e cila dje drejtoi gishtin kah ish-opozita duke e bërë përgjegjëse për mosmbajtjen e një seance ku do të votoheshin zgjatja e buxhetit për disa muaj, buxheti për Prishtinë dhe Gjilan, pagat për RTK-në dhe paketa për Planin e Rritjes.
Abdixhiku tha se natën kur Glauk Konjufca u nominua si mandatar për kryeministër të vendit, ai kishte shprehur gatishmëri te presidentja që të gjitha këto të votoheshin në një paketë, madje që të quhej edhe si Pako e Presidentes.