Sot do të mbahet mbledhje e jashtëzakonshme e Asamblesë Komunale në Prishtinë, e thirrur nga këshilltarët komunalë të Lëvizjes Vetëvendosje (LVV-së).
Mbledhja është thirr për emërimin e kryesuesit të Kuvendit dhe pritet të nisë në ora 11:00.
Gazeta Sinjali mëson nga burimet e saja se Kryesues i Asamblesë Komunale Prishtinës pritet të zgjidhet Fehmi Kupina pas mbështetjes që pritet ta merr nga asamblistët e Lëvizjes Vetëvendosje dhe ata të Partisë Demokratike të Kosovës.
Fehmi Kupina ishte shkarkuar nga pozita e Kryesuesit të Asamblesë Komunale në Prishtinë pasi kishte dhënë dorëheqje nga Lidhja Demokratike e Kosovës. Tash ai funksionon i pavarur.
Ky fakt i ka mjaftuar asamblistëve të VV-së për hapin e ri që pritet të ndodh sot, pasi kanë njoftuar se kanë kaluar dy javë nga shkarkimi i kryesuesit të Kuvendit Komunal dhe ende nuk ka rezultat konkret për emërimin e kryesuesit të ri nga partia që ka pushtetin në Prishtinë, LDK-ja dhe kryetari Përparim Rama.
LV-ja përmes një njoftimi ka bërë me dije se kuvendi komunal vazhdon të mbetet jofunksional dhe po bëhen tre muaj që nuk ka mbajtur asnjë mbledhje të rregullt.
“Shumë çështje esenciale për qytetin, rregullore e projekte, pika diskutimi e vendime, kërkesa e ankesa, kanë mbetur pezull dhe të patrajtuara nga ata që janë të zgjedhur dhe kompetentë për këtë punë, këshilltarët komunalë”, thuhet në njoftimin e LVV-së për medie.
Ndër të tjera, në njoftim thuhet se bllokada totale u konvenon vetëm pushtetarëve komunalë.
“S’ka se si të jetë ndryshe kur kemi parasysh faktin se janë ata që nuk thërrisnin mbledhje në kohën kur kuvendi kishte kryesues dhe gjithashtu tash e dy javë nuk morën veprime për funksionalizimin e kuvendit, për të propozuar kryesues të ri. Në një situatë të tillë, duke qenë grupi më i madh në kuvendin komunal, dhe duke e ditur përgjegjësinë e përfaqësimit të qytetarëve të Prishtinës, si dhe nevojën për lëvizjen e proceseve përpara, grupi ynë i këshilltarëve komunalë ka deponuar nënshkrimet e nevojshme për thirrjen e mbledhjes së jashtëzakonshme të Kuvendit Komunal të Prishtinës, me pikën e vetme të rendit të ditës: Zgjedhjen e Kryesuesit të Kuvendit”, thuhet tutje në njoftim.
/TV Arbëria