Presidenti francez, Emmanuel Macron ka thënë se do të emërojë një kryeministër të ri “në ditët në vijim”, pasi Michel Barnier dha dorëheqje pas një votimi mosbesimi në parlament.
Në një fjalim 10-minutësh drejtuar kombit të enjten, ai hodhi poshtë presionin e opozitës për t’u dorëzuar, duke u zotuar të qëndrojë në postin e tij “plotësisht, deri në fund të mandatit” në 2027.
Ai falënderoi Barnier për përkushtimin e tij gjatë mandatit të tij të shkurtër si kryeministër dhe akuzoi ekstremin e djathtë dhe të majtën franceze për bashkëpunim në një “front anti-republikan” për të rrëzuar qeverinë.
Deputetët francezë votuan me shumicë dërrmuese për largimin e Barnierit të mërkurën, vetëm tre muaj pasi ai u emërua nga Macroni, raporton BBC.
Ishte hera e parë që një qeveri franceze u votua nga parlamenti në më shumë se 60 vjet, një lëvizje që Macroni e quajti “të paprecedentë”.
Në Francë, është presidenti ai që zgjedh kryeministrin që më pas drejton qeverinë. Por kryeministri duhet t’i përgjigjet parlamentit dhe Barnier zgjati vetëm tre muaj para se të rrëzohej në një votë mosbesimi.
Gjetja e dikujt që nuk do të refuzohet menjëherë nga parlamenti mund të jetë e vështirë për Macron, vendimi i të cilit në qershor për të thirrur zgjedhje të parakohshme çoi në një parlament të bllokuar.
Asambleja Kombëtare tani është e ndarë në tre blloqe të mëdha votuese – e majta, qendra dhe e djathta ekstreme. Nëse zgjedhja e ardhshme e kryeministrit të Macron do të zgjasë, mendohet se të paktën një pjesë e bllokut të majtë do të duhet të bindet për t’iu bashkuar qeverisë së ardhshme.
Nuk mund të mbahen zgjedhje të reja parlamentare deri në korrik 2025, kështu që hapat e ardhshëm të presidentit mund të jenë një sfidë.