Në Sallën e Kuvendit të Komunës së Drenasit, kryetari Ramiz Lladrovci së bashku me drejtorët komunalë, priti një delegacion të lartë të NATO-s, të udhëhequr nga Gjeneral brigade Ylli Pulaj.
Delegacioni përbëhej nga oficerë dhe zyrtarë nga Shqipëria, Italia, Hungaria, Turqia dhe Kosova.
Gjatë takimit, kryetari Lladrovci shprehu falënderim dhe mirënjohje për vizitën dhe për punën e NATO-s në Kosovë, duke theksuar se: “Pa NATO-n, Kosova nuk do të ishte kjo që është sot – shtet që ofron liri, siguri, barazi dhe sundim të ligjit për të gjithë qytetarët”.
Ai gjithashtu i njoftoi mysafirët me të arriturat, sfidat dhe historinë e re të komunës, duke përkujtuar kontributin e madh të Drenasit në lirinë e vendit.
“Komuna jonë ka vetëm 2.6% të territorit të Kosovës, por 8.6% të dëshmorëve dhe martirëve – kjo tregon përkushtimin e jashtëzakonshëm të qytetarëve tanë.”
Lladrovci theksoi se Drenasi është kampion i qeverisjes së mirë dhe komunë ku ligji, barazia dhe përfshirja gjinore janë pjesë e përditshmërisë institucionale.
Ai falënderoi KFOR-in dhe oficerët e NATO-s për bashkëpunimin e ngushtë dhe për rolin që kanë në ruajtjen e paqes dhe stabilitetit.
Në fund, Lladrovci shtoi: “Aleanca jonë me NATO-n, e krijuar në momentet më të vështira të jetës së popullit tonë, mbetet e përhershme. Jemi krenarë që jemi pjesë e familjes së vlerave euro-atlantike.”