Kushtrim Gashi ka reaguar lidhur me gjendjen në kryeqytet, duke theksuar se qytetarët e Prishtinës po përballen me rritje të vazhdueshme të çmimeve për shërbimet bazë, ndërsa sipas tij cilësia e shërbimeve mbetet e dobët.
Ai ka përmendur rritjen e kostos për ujin, pastrimin, energjinë elektrike dhe tarifat komunale, duke theksuar se në shumë lagje të qytetit vazhdojnë të shihen mbeturina të shumta, kontejnerë të stërmbushur dhe hapësira publike të papastra.
Gashi ka bërë thirrje që të ketë më shumë transparencë dhe llogaridhënie për mënyrën se si menaxhohen paratë publike dhe projektet komunale. Ai ka propozuar edhe iniciativën “Prishtina nën lupë”, përmes së cilës synohet të trajtohen problemet e qytetit, përfshirë menaxhimin e mbeturinave, rritjen e çmimeve të shërbimeve dhe projektet komunale.
Sipas tij, qytetarët duhet të ngritin zërin dhe të kontribuojnë me vërejtje dhe propozime për përmirësimin e gjendjes në kryeqytet.