Kryeministri Albin Kurti mbrëmë u takua me bashkatdhetarë në Slloveni. Në tubim ishte edhe ambasadori i Kosovës në Slloveni, Valdet Sadiku, i cili s’u përmend në komunikatën e lëshuar nga zyra e Kurtit.
Ai, siç njoftoi zyra e tij, shprehu mirënjohjen për “angazhimin, punën dhe kontributin e tyre në shoqërinë sllovene dhe për vendin e tyre të origjinës, Kosovës dhe Shqipërinë”.
“Me këtë rast, ai theksoi se ata janë një urë e jashtëzakonshme ekonomike, kulturore dhe tregtare ndërmjet dy vendeve tona, Republikës së Kosovës dhe Republikës së Sllovenisë, një shtet dhe popull mik i shqiptarëve në përgjithësi”, thuhet në komunikatë.
“Ne asnjëherë nuk e harrojmë rolin që e ka luajtur Republika e Sllovenisë prej strehimit të disidentëve dhe shqiptarëve të persekutuar në vitet e ’80-ta dhe sidomos në vitet e ’90-ta, pastaj për rolin e tyre në çlirimin e Kosovës dhe më pas për njohjen e pavarësisë së Kosovës dhe për mbështetjen tonë në arenën ndërkombëtare çdo herë kur është kërkuar nevoja”, citohet të ketë thënë ai.
Kurti “foli edhe për qeverisjen tij, duke veçuar disa prej arritjeve dhe politikave kryesore në këto gati katër vjetët e fundit”, thotë ZKM.
“Ndër to nënvizoi faktin që jemi qeveria e parë e cila e përmbyll mandatin e plotë, si dëshmi e stabilitetit institucional në Kosovë, i cili është faktor i rëndësishëm si për rritjen ekonomike ashtu edhe për progresin demokratik dhe për sigurinë e vendit tonë”, thuhet në komunikatë.
“Bashkatdhetarëve tanë kryeministri i bëri thirrje të vazhdojnë të regjistrohen online në kuadër të regjistrimit të popullsisë deri më 31 dhjetor, duke i inkurajuar t’i deklarojnë edhe dëmet, vuajtjet, humbjet që i kanë përjetuar si individë dhe si familje në luftën e fundit në Kosovë, pasi për herë të parë është duke e bërë regjistrimi i dëmeve të luftës në nivel shteti. Gjithashtu u bëri thirrje që regjistrohen online për votim nga jashtë në mënyrë që të mund të përfitojnë nga lehtësimet që ofron ligji i ri për zgjedhje të përgjithshme, përkatësisht votimin në ambasada dhe konsullata dhe votimin me postë brenda vendit. Afati për këtë regjistrim është deri më 26 dhjetor”, thuhet tutje në komunikatën e ZKM-së.
