Kryeministri Albin Kurti prezantoi projektin fitues për Teatrin e Operës dhe Baletit, një realizim i vizionit të arkitektit danez Bjarke Ingels.
Ky projekt, sipas Kurtit, do të shënojë një epokë të re artistike për Kosovën, duke ofruar një ikonë të munguar të arkitekturës bashkëkohore.
Tutje, Kurti thotë se teatri do të ndërtohet në zemër të Prishtinës dhe do të përmbajë sallë koncertale dhe teatrale me kapacitet mbi 2500 ulëse, si dhe një parking nëntokësor me mbi 400 vendparkime.
“Projekti, me vlerë 2.45 milionë euro, do të përfundojë brenda 15 muajve, me fillimin e ndërtimit në vitin 2026”, shkruan tutje Kurti.
Shkrimi i plotë:Sot prezantuam projektin fitues për Teatrin e Operës dhe Baletit, një mishërim i vizionit të guximshëm të arkitektit të famshëm danez Bjarke Ingels, me të cilin po fillon një epokë e re artistike për Kosovën. Pas 50 vitesh shtëpia e re e institucioneve qendrore të arteve muzikore dhe skenike do t’i ofrojë Prishtinës një ikonë të munguar të arkitekturës bashkëkohore, duke e vendosur atë në lartësinë e hartës botërore të kulturës.
Teatri do të ndërtohet në zemër të Prishtinës dhe përmban sallën koncertale me mbi 1200 ulëse, sallën teatrale me 1000 ulëse, dhomën koncertale dhe dhomën teatrale, të dyja me nga 300 ulëse. Ndërsa do të akomodojë parkingun nëntokësor me kapacitet me mbi 400 vendparkime pranë unazës së brendshme të Prishtinës, dhe do të jetë kalimi më spektakolar në mes të Pallatit të Rinisë dhe Sporteve dhe lagjes Arbëria.
Bjarke Ingels, njëherit themeluesi i shtëpisë prestigjioze të projektimit BIG, është ndër arkitektët më inovativë të kohës sonë i njohur për projektet mbresëlënëse si rrokaqielli piramidal “Via 57 West” në New York, centrali energjetik CopenHill me pistë skijimi në Kopenhagë, selia e Google në Kaliforni dhe “The Spiral” në Manhatan.
Vlera e projektit për Teatrin e Operës dhe Baletit është 2 milionë e 450 mijë euro dhe do të përfundojë për 15 muaj, ndërsa zbatimi fillon në vitin 2026.