Kryetari i Komunës së Prishtinës, Përparim Rama, se bashku me Drejtorin e Drejtorisë së Shërbimeve Publike, Bekim Brestovci, Drejtorin e Inspektoratit, Florian Dushi si dhe përfaqësuesin nga Kompania Regjionale “Pastrimi” Sh.A, Riza Selimi, kanë mbledhur në një takim përfaqësuesit e supermarketeve, me të cilët kanë diskutuar mbi Rregulloren e re për Menaxhimin e Mbeturinave.
Sipas njoftimit të Komunës, rregullorja e re parasheh rritjen e përgjegjësisë së bizneseve për menaxhimin e mbeturinave dhe reduktimin e ndotjes.
“Përmes bashkëpunimit dhe diskutimeve konstruktive, palët shprehën përkushtimin e tyre për të implementuar praktika të qëndrueshme dhe efikase që do të ndihmojnë në ruajtjen e mjedisit dhe promovimin e një kulture përgjegjësie ndaj mbeturinave. Vec këtij takimi, do të mbahen edhe takime tjera me qytetarë e institucione private për t’u njoftuar me veprimet që do të ndërmerren nga Kryeqyteti për zbatimin e Rregullores për Menaxhimin e Mbeturinave”, thuhet në njoftim.
/TV Arbëria