Kryeministri sllovak Robert Fico ka rifilluar punën pothuajse dy muaj pas një atentati të dështuar ndaj tij. Populisti i majtë Fico mori pjesë sot në një takim të kabinetit në Bratislavë.
Sipas një deklarate, 59-vjeçari tha se po i rikthehej ritmit të punës dhe shpresonte se së shpejti do të ishte në gjendje të përmbushte plotësisht rolin e tij.
Në faqen e tij në Facebook, Fico iu drejtua me sarkazëm “medias progresive dhe liberale” dhe opozitës, duke postuar: “Më falni që mbijetova, por jam rikthyer”.
Agjencia TASR raportoi se Fico zhvilloi një bisedë telefonike edhe me kryeministrin ukrainas Denys Shmyhal. Ai thuhet se ofroi trajtimin e pacientëve me kancer nga Ukraina në Sllovaki, pas sulmit të fundit rus në një spital pediatrik në Kiev.
Gjithashtu, ata diskutuan organizimin e një mbledhjeje të përbashkët qeveritare mes dy shteteve fqinje, e planifikuar në fillim të vjeshtës.
