Ish-deputeti i Kuvendit të Kosovës nga Partia Demokratike e Kosovës, Hisen Berisha, në emisionin Arb Debat me Rid Berishën, ka thënë se vonesat në krijimin e qeverisë nuk janë korrekte.
Ai ka kritikuar partitë politike në këtë aspekt, duke thënë: “Shqetësuese janë përplasjet politike, duke kalkuluar me interesa grupore, partiake apo edhe personale.”
Berisha shton se mund të mos ketë gatishmëri nga partitë në vend për të drejtuar procesin e dialogut Kosovë-Serbi.
“Vonesat mendoj që janë jo korrekte dhe do të përballen me sfida të karakterit kushtetues. Kushtetuta flet qartë, ka mekanizma që i rregullon këto situata. Ajo që është më shqetësuese janë përplasjet politike, duke kalkuluar me interesa grupore, partiake apo edhe personale, të cilat pastaj shkaktojnë vonesa, përçarje dhe distancim të subjekteve politike. Mungesa e vullnetit për të ofruar një zgjidhje të shpejtë, po ashtu lidhet me tendencat dhe ambiciet e tyre, apo jo gatishmërinë për të marrë përgjegjësi në drejtimin e procesit të dialogut,” ka thënë Berisha në Arb Debat.