Kryetari i Kuvendit, Glauk Konjufca, ka mbrojtur të drejtën e Kosovës për të propozuar draftin e Asociacionit të Komunave me Shumicë Serbe, duke kundërshtuar ndërhyrjet nga Bashkimi Evropian. Deklaratat e tij ngjallin interes, sidomos krahasuar me qëndrimet e kryeministrit Albin Kurti, i cili kishte shpjeguar se nuk kishte propozuar një draft për të shmangur një kompromis të pafavorshëm për Kosovën.
Kryetari i Kuvendit, Glauk Konjufca, ka theksuar të drejtën e Kosovës për të propozuar vetë draftin e Asociacionit të Komunave me Shumicë Serbe, duke kundërshtuar çdo përpjekje nga Bashkimi Evropian për të ndërhyrë në këtë proces.
Ai ka shprehur shqetësimin se një dokument i tillë, i propozuar nga BE-ja, do të përbënte një shkelje të kompetencave shtetërore të Kosovës, të cilat janë garantuar në marrëveshjet e negociatave dhe ligjet e vendit.
Megjithatë, deklaratat e Konjufcës ngjallin kureshtje të krahasohen me qëndrimet e kryeministrit Albin Kurti, të nëntorit të 2023-tës.
Më 3 nëntor, Kurti kishte shpjeguar se nuk kishte propozuar një draft-statut për Asociacionin sepse kishte besuar se ishte më e mençur të priste që ndërmjetësit të mos sjellnin një kompromis që do të ishte i pafavorshëm për Kosovën.
“Unë konsideroj që do të kishte qenë gabim, ta zëmë në majin ose qershorin, që ne ta shkruajmë një statut për Asociacionin sepse atëherë ka qenë trysnia edhe insistimi më i madh”, kishte thënë Kurti.
“Nëse ne si Kosovë do të shkruanim një draft-statut, atëherë për mua, prej bisedimeve të brendshme, ka qenë shumë e qartë se ndërmjetësi ka tendencën ta gjejë mesataren, dhe ajo mesatare do të ishte shumë më e keqe për neve”, kishte shtuar Kurti.
Ndërkaq, Konjufca vuri në dukje se Kosova ka pasur të drejtën për të paraqitur një draft-statut dhe se vonesat në këtë proces nuk do të thonë se duhet t’i hiqet kjo kompetencë Kosovës
“Ma i imponu Kosovës në këtë mënyrë. Më i thënë ky është dokumenti (draftstatuti i Asociacionit), edhe vetëm ky, 20 faqesh dhe nuk ka tjetër. Dhe vetëm ky duhet të shkoj në Gjykatë Kushtetuese, unë mendoj që jo që nuk është fer ndaj Kosovës por mendoj që është një qasje shumë diskriminuese e BE-së. I cili Kosovën e trajton si një jo shtet… Kosova duhet ta mbrojt të drejt të vetë deri në fund. Cila është drejta e vet. Me u ulë me BE-në edhe me qartës më në fund, kush e ka këtë kompetencë, Kosova apo BE-ja. Unë mendoj që e ka Kosova. A jemi vonuar apo jo, ashtu kështu jemi në masa të BE-së. Në nën masat e BE-së. Mjafton kjo me pagu çmimin që jemi vonuar. Por vonesa nuk mundet me na marrë kompetencën neve. Që Qeveria është kompetente m paraqite një draft të vetin para Gjykatës Kushtetuese”, ka thënë Konjufca të hënën (sot), pas mbledhjes së Kryesisë së Kuvendit.
