Trajneri i Liverpoolit, Jurgen Klopp, tha se eliminimi nga çerekfinalet e Ligës së Evropës mund t’i ndihmojë ata të përqëndrohen në luftën për titull të kampionit të Premierligës.
Pas humbjes 3-0 ndaj Atalantës në ndeshjen e parë në “Anfield”, penalltia e hershme e Mohamed Salah në ndeshjen e kthimit të enjten i dha Liverpool-it një fitore 1-0 në Itali, por skuadra e Klopp u eliminua nga gara me rezultat të përgjithshëm 3-1.
“Të zhgënjyer që nuk kaluam, por jo të frustruar apo të zemëruar. Tani mund të përqendrohemi te liga dhe kjo është ajo që do të bëjmë”, u tha Klopp gazetarëve.
“Kemi disa ditë për t’u rikuperuar dhe më pas do të luajmë me Fulhamin , gjë që do të jetë e ndërlikuar, por ne do të japim gjithçka. Kjo është lufta jonë tani“, tha Klopp.
Liverpooli i vendit të tretë ka 71 pikq, aq sa ka edhe Arsenali, por mbetet në diferencë golash, ndërsa ideri Manchester City ka 73 pikë.
Klopp tha se nuk ishte i shqetësuar për formën e Salah kur u pyet për paraqitjet e sulmuesit në ndeshjet e fundit.
“Penalltia ishte super bindëse, një super penallti, pastaj rasti tjetër, padyshim që ishte i pafat, por nuk është hera e parë që ai humbi një shans të tillë”, shtoi Klopp.
“Unë nuk jam veçanërisht i shqetësuar. Kështu bëjnë sulmuesit, kështu ndodh me sulmuesit, kështu është“, tha në fund Klopp.
/TV Arbëria