Një festë ditëlindjeje është shndërruar në tragjedi, pasi një person hapi zjarr brenda një salle banketesh, duke lënë të vdekur tre fëmijë dhe një të rritur, ndërsa 11 persona të tjerë u plagosën.
Ngjarja ndodhi në pjesën veriore të qytetit të Stocktonit, ku po mbahej një festë me rreth 100 deri në 150 të ftuar. Viktimat janë fëmijë të moshave 8, 9 dhe 14 vjeç, si dhe një 21-vjeçar. Të plagosurit janë dërguar në spitale të zonës, por gjendja e tyre ende nuk është bërë e ditur.
Zëdhënësja e Zyrës së Sherifit të Qarkut San Joaquin, Heather Brent, tha se hetimet janë në fazat fillestare, por të dhënat e para ngrenë dyshime se sulmi ka qenë i qëllimshëm. “Treguesit e hershëm sugjerojnë se mund të kemi të bëjmë me një akt të synuar,” deklaroi Brent, duke theksuar se informatat janë ende të kufizuara dhe hetimet po vazhdojnë intensivisht, raportojnë mediat ndërkombëtare.
Sherifi i Qarkut San Joaquin, Patrick Withrow, u bëri thirrje qytetarëve të bashkëpunojnë me autoritetet për të gjetur autorin që aktualisht është në arrati. “Ne do të gjejmë ata që e kryen këtë krim dhe do t’i sjellim para drejtësisë, por na duhet ndihma e komunitetit,” u shpreh Withrow, duke nënvizuar bindjen se sulmi nuk ishte i rastësishëm. Sipas tij, hetuesit po shqyrtojnë mundësinë e një motivi të lidhur me banda apo faktorë të tjerë.
Ngjarja ka shtuar edhe më tej shqetësimet rreth dhunës së shtuar me armë në Shtetet e Bashkuara. Ish-kongresistja Gabby Giffords, e mbijetuar e një sulmi të mëparshëm dhe themeluese e organizatës “Giffords” për parandalimin e dhunës me armë, shprehu ngushëllimet e saj për familjet e viktimave, duke e quajtur ngjarjen “të tmerrshme dhe të papranueshme”.
Autoritetet vazhdojnë hetimet ndërsa përpiqen të zbardhin motivin dhe të identifikojnë personin përgjegjës për sulmin.