Drejtori i gazetës online Reporteri.net, Bekim Kabashi ka reaguar pas rastit të gjetjes së një mjeti të dyshimtë gjurmues në veturën e gazetarit Vehbi Kajtazi.
Kabashi ka thënë se ky rast duhet të hetohet urgjentisht.
Sipas tij, veprime të tilla ndaj gazetarëve janë metoda të pushteteve autoritare.
“Atë që po e themi prej kohësh e që e konstatoi dje edhe Raporti i Progresit, e dëshmon sot edhe më shumë veprimi ndaj Vehbi Kajtazit. Kjo nuk është diçka e re. Është reprizë e veprimeve të pushteteve autoritare, me metoda staliniste. Nëse ka mbetur ndonjë institucion i pavarur e që ende nuk është i kapur nga partia-shtet dhe e ka guximin të veprojë në bazë kushtetutës dhe ligjit, duhet urgjent të fillohet një hetim i pavarur dhe trasnparent, që kjo praktikë të marrë fund.”, ka shkruar Kabashi,
Gazetari Vehbi Kajtazi ka njoftuar sot se një pajisje e dyshimtë i është vendosur në veturën e tij.
Sipas Kajtazit, pajisja e dyshimtë që ka qenë e vendosur në veturën e tij është zbuluar pasi ai e kishte dërguar veturën për kontrollim.
Kajtazi ka deklaruar se më nuk ndihet i sigurtë, derisa ka shtuar që ky rast konfirmon që s’ka siguri as juridike e as fizike.
Përmes një postimi, Kajtazi ka kërkuar që gjatë procesit të ekzaminimit të pajisjes, të jenë të pranishëm edhe avokatët e tij, raporton gazeta online Reporteri.net.
Po ashtu ai thënë se pajisja është prodhim britanik dhe ka një SIM kartelë e internet, që sipas tij, është lehtë e verifikueshme se kujt i përket.
“Siç jeni te njoftuar, sot rreth orës 10:00 paradite kam dërguar veturën për kontroll në servis. Gjatë kontrollit është zbuluar një pajisje e dyshimtë ngjitur në shasi, në anën e majtë prapa. Menjëherë kam kontaktuar Policinë e Kosovës. Pas ardhjes së një patrulle të stacionit të Graçanicës, është kontaktuar njësia kundër bombave e Policisë dhe Krimet e Rënda. Njesitët e specializuara kanë tërhequr këtë pajisje dhe kanë konstatuar së është GPS, me numër serik. Është bërë kontrolli i veturës për ndonjë mjet tjetër të dyshimtë, por nuk është zbuluar ndonjë gjë. Unë tashme nuk ndjehem i sigurt, ndonëse nuk ua kam frikën. Po konfirmohet se nuk ka siguri juridike më. Mbase as fizike. Pajisja është prodhim britanik me SIM kartë dhe internet. Është lehtë e verifikueshme se kujt i përket”, ka shkruar gazetari në Facebook.
Pwr rastin janw deklaruar edhe nga Policia e Kosovws.
Policia e Kosovës ka nisur hetimet për rastin e gjetejes së një pajisjeje të dyshimtë në veturën e gazetarit, Vehbi Kajtazi.
Sipas Policisë pajisja dyshohet që është GPS (Sistemi Global i Pozicionimit), shkruan gazeta online Reporteri.net.
Policia ka bërë të ditur se e ka intervistuar gazetarin Kajtazi.
“Pas pranimi të këtyre informacioneve nga Policia e Kosovës janë ndërmarr veprime të menjëhershme policore, është intervistuar gazetari në fjalë dhe këto informacione (edhe një pajisje/dëshmi që sipas informatave fillestare dyshohet të jetë GPS), janë duke u trajtuar në bashkëpunim me prokurorinë për të sqaruar rrethanat dhe dyshimet e tjera, përfshirë këtu edhe angazhimin e profesionistëve të Policisë së Kosovës që merren me trajtimin e mjeteve apo pajisjeve të dyshimta.”, kanë thënë në një përgjigje për Reporteri.net nga Drejtoria për Informim dhe Marrdhënie me Publikun në Policinë e Kosovës.
Sipas Policisë, për mbarëvajtjen dhe rezultatet e hetimeve që po realizohen në bashkëpunim me prokurorinë, do të njoftohet me kohë.