Kandidati republikan për president të SHBA-së, Donald Trump, ka delaruar të martën se Bashkimi Evropian do të duhet “të paguajë një çmim të madh” për mosblerjen e eksporteve të mjaftueshme amerikane.
Kjo do të ndodhë sipas tij nëse ai i fiton zgjedhjet presidenciale të 5 nëntorit.
“Do t’ju them diçka, Bashkimi Evropian tingëllon shumë bukur, shumë këndshëm, apo jo? Të gjitha shtetet e bukura e të vogla evropiane që bëhen bashkë” – tha miliarderi amerikan gjatë një tubimi në Pensilvani, pasi premtoi se do ta miratonte “aktin Trump për tregti reciproke”, raporton agjencia “Reuters”.
“Ata nuk i marrin veturat tona. Ata nuk i marrin prodhimet tona të fermave. Ata shesin miliona e miliona vetura në Shtetet e Bashkuara. Jo, jo, jo, ata do të duhet të paguajnë një çmim të madh” – paralajmëroi Trump.
Ai është zotuar për vendosjen e një takse të importit prej 10 për qind ndaj të gjitha shteteve, ndërsa 60 për qind për mallrat që vijnë nga Kina.
Një veprim i tillë do t’i godiste zinxhirët furnizues në mbarë botën, me gjasë duke nxitur hakmarrje e rritje të kostove, paralajmërojnë ekonomistët.