Dhjetëra njerëz janë raportuar të vrarë dhe të plagosur pas një sulmi izraelit në shkollën Tabeen në qytetin e Gazës gjatë natës.
Qeveria e drejtuar nga Hamas thotë se më shumë se 100 njerëz u vranë në sulm dhe shumë të tjerë u plagosën, sidoqoftë, zyrtarët shëndetësorë të Gazës thonë se numri i të vdekurve është rreth 60, shkruan The Guardian, transmeton Gazeta Express.
Ushtria izraelite për këtë sulm në shkollë ka thënë se kanë shënjestruar “rreth 20 militantë të Hamasit dhe Xhihadit Islamik që po vepronin nga shkolla e qytetit të Gazës”.
“Kompleksi dhe xhamia që u godit brenda tij, shërbeu si një objekt ushtarak aktiv i Hamasit dhe Xhihadit Islamik”, tha nënkoloneli Nadav Shoshani në X.
Ai shtoi se shifrat e viktimave të dhëna nga zyra e medias e drejtuar nga Hamasi “nuk përputhen me informacionin e mbajtur nga IDF (Forcat e Mbrojtjes izraelite), municionet e sakta të përdorura dhe saktësinë e sulmit”.
Ushtria izraelite tha në një deklaratë se forcat e saj ajrore synonin një qendër komandimi dhe kontrolli ku fshiheshin luftëtarët e Hamasit.
Ushtria tha se kishte ndërmarrë hapa për të zvogëluar rrezikun e dëmtimit të civilëve, “duke përfshirë përdorimin e municioneve të sakta, mbikëqyrjen ajrore dhe informacionin e inteligjencës”. Ai nuk komentoi menjëherë raportet e viktimave nga Gaza, raportoi Reuters.
Hamasi tha se sulmi ishte një krim i tmerrshëm dhe një përshkallëzim serioz. Izraeli thotë se grupi militant futet në mesin e civilëve të Gazës, duke operuar brenda shkollave, spitaleve dhe zonave të caktuara humanitare – gjë që Hamasi e mohon.
Egjipti ka thënë se “vrasja e qëllimshme” e palestinezëve të paarmatosur nga Izraeli tregon se atij i mungon vullneti politik për t’i dhënë fund luftës në Gaza.