Izraeli zgjeroi urdhrat e evakuimit në Khan Younis në Rripin jugor të Gazës gjatë natës, duke detyruar dhjetëra mijëra banorë palestinezë dhe familje të zhvendosura të largoheshin në errësirë ndërsa shpërthimet nga bombardimet e tankeve kumbuan rreth tyre.
Ushtria izraelite tha se po sulmonte militantët e grupit Hamas – i cili administronte Gazën para luftës – të cilët po i përdornin ato zona për të organizuar sulme dhe për të hedhur raketa. Të shtunën, një sulm ajror izraelit në një shkollë ku palestinezët e zhvendosur ishin strehuar në qytetin e Gazës vrau të paktën 90 njerëz, sipas shërbimit të mbrojtjes civile, duke shkaktuar një protestë ndërkombëtare.
Ushtria izraelite tha se kishte goditur një postë komanduese të militantëve të Hamasit dhe Xhihadit Islamik, një pretendim që të dy grupet e hodhën poshtë si pretekst dhe vrau 19 militantë, raportoi Reuters.
Në Khan Younis në jug të Rripit të Gazës, udhëzimi i evakuimit mbuloi rrethet në qendër, lindje dhe perëndim, duke e bërë atë një nga urdhrat më të mëdhenj të tillë në konfliktin 10-mujor, dy ditë pasi tanket u kthyen në lindje të qyteti.
Njoftimi u postua në X dhe në mesazhe me tekst dhe audio në telefonat e banorëve: “Për sigurinë tuaj, ju duhet të evakuoni menjëherë në zonën e re humanitare. Zona ku ndodheni konsiderohet një zonë e rrezikshme luftarake.”