Ish-këshilltari i Hashim Thaçit, Ismail Syla, në një prononcim për TV Arbëria ka thënë se mbajtja e Thaçit në Hagë është padrejtësia më e madhe që i është bërë kombit shqiptar.
“Kjo është padrejtësia më e madhe që i është bërë kombit shqiptar, sepse faktikisht burrështetasi themelor, njeriu që shpalli pavarësinë e Kosovës, njeriu më pro-perëndimor, me vlera të një demokracie të mirëfilltë, bashkëpunëtori më i ngushtë i SHBA-ve dhe i frymës evropiane perëndimore, faktikisht sot, në kohën kur zhvillohen luftimet në Gazë dhe në Ukrainë, sot, kur bota është në një farë mënyre në reformim të ri ndërkombëtar, sot mbahet Hashim Thaçi në një burg,” ka thënë Syla.
Syla ka treguar takimin e fundit me babain e Hashim Thaçit, Haxhi Thaçin, dhe tregon se cilat ishin fjalët që ia tha.
“Për herë të fundit e kam takuar në klinikën e infeksioneve dhe ishte në gjendje të keqe shëndetësore dhe kishte probleme me frymëmarrjen. Edhe unë kam thënë kështu: Baca Haxhi, sa herë të marrësh frymë, dije që duhet me marrë frymë se djali yt ka me u kthyer në vitin 2025 dhe viti 2025 është viti i Hashim Thaçit. Ia kam përsëritur këtë disa herë, duke u përpjekur të fus energji dhe jetë në atë organizëm të lodhur.”, tha Syla për TV Arbëria.