Ish-avokati personal i presidentit amerikan Donald Trump, Todd Blanche, është konfirmuar me një diferencë të ngushtë si Prokuror i Përgjithshëm i SHBA-së – zyrtari më i lartë i vendit për zbatimin e ligjit.
Votimi i dha fund një përplasjeje të gjatë mes republikanëve të Senatit dhe administratës Trump lidhur me Blanche, i cili ka shërbyer si ushtrues detyre i Prokurorit të Përgjithshëm që nga prilli, raporton BBC.
Blanche u konfirmua me rezultatin 50-49 në një votim të zhvilluar gjatë natës, ku dy senatore republikane, Susan Collins dhe Lisa Murkowski, iu bashkuan të gjithë demokratëve për të kundërshtuar nominimin e tij.
Senatori Bill Cassidy dha votën vendimtare, një vendim që u ndoq nga afër në Uashington, duke pasur parasysh konfliktet e vazhdueshme prej vitesh mes senatorit republikan të Luizianës dhe Trumpit.
Pas votimit, Blanche tha se ishte “thellësisht i nderuar nga besimi dhe mbështetja që Presidenti Trump ka vendosur tek unë”.
Disa senatorë republikanë kishin ngritur shqetësime lidhur me mënyrën se si Blanche kishte trajtuar publikimin e dokumenteve të lidhura me Jeffrey Epstein, si dhe rolin e tij në krijimin e fondit prej 1.8 miliardë dollarësh (1.3 miliardë paund) të Trumpit, të ashtuquajturit fond “kundër instrumentalizimit”.
Fondi ishte planifikuar të ofronte kompensim për individët që pretendonin se ishin persekutuar nga qeveria, por kritikët, përfshirë Murkowskin, kishin frikë se fondet do t’u jepeshin personave që ishin ndjekur penalisht për pjesëmarrje në sulmin ndaj Kongresit më 6 janar 2021.
Blanche përfundimisht u zotua ta tërhiqte fondin, pas reagimeve të forta nga senatorët republikanë gjatë seancave për konfirmimin e tij.
Megjithatë, mbetet e paqartë nëse ky zotim është ligjërisht detyrues ose nëse Trump mund ta bindë më vonë Blanche, ish-avokatin e tij personal, të rikthejë një skemë të ngjashme me një emër tjetër.
Çështjet që rrethonin Blanche bënë që senatorët Collins dhe Murkowski të mos e mbështesnin atë fillimisht. Kjo e fundit tha se nuk kishte besim te Blanche për të “frenuar impulset më të këqija të kësaj administrate”.
Murkowski njoftoi të premten se do të votonte kundër Blanche, duke iu referuar shqetësimeve për “politizimin” e Departamentit të Drejtësisë.
Collins gjithashtu ngriti shqetësime për rolin e Blanche në zgjidhjen e padisë prej 10 miliardë dollarësh të Trumpit kundër Shërbimit të të Ardhurave të Brendshme (IRS), por tha se në fund kishte besim te Blanche për t’i dhënë presidentit këshilla të sinqerta ligjore.
Para se të jepte votën vendimtare, Cassidy tha se besonte se Blanche ishte alternativa më e mirë që presidenti do të propozonte.
“Ky nuk është një referendum për Presidentin Trump, por një vendim lidhur me zotin Blanche, në rrethana shumë specifike”, tha Cassidy të premten. “Duke i marrë të gjitha parasysh, do të votoj për zotin Blanche.”
Cassidy pranoi se Trump është vendimmarrësi përfundimtar për drejtimin e Departamentit të Drejtësisë, por tha se konfirmimi nga Senati do t’i jepte Blanche “më shumë ndikim për të shtyrë përpara gjërat që duhet të shtyhen”.
Gjatë procesit të dytë të shkarkimit të Trumpit në vitin 2021, Cassidy votoi për shpalljen fajtor të Trumpit lidhur me trazirat në Kapitol më 6 janar 2021. Votimi nuk kaloi dhe, kur Trump u rikthye në detyrë, ai arriti ta detyronte Cassidy-n të tërhiqej nga gara, duke mbështetur një kundërshtar të tij në zgjedhjet paraprake për vendin e senatorit të Luizianës në fillim të këtij viti.
Në një postim në X, lideri demokrat i Senatit, Chuck Schumer, shprehu shqetësimin se emërimi i Blanche do të ishte “një justifikim i gatshëm për të vazhduar korrupsionin e tij të përhapur dhe tronditës”.
“Todd Blanche nuk ka ndërmend ta ndalë korrupsionin e Trumpit. Ai e ka avancuar karrierën e tij duke e mundësuar atë”, shkroi ai. “Çdo senator që votoi për konfirmimin e tij tani e ka etiketuar veten si bashkëpunëtor në këtë.”
Por shumica e republikanëve e festuan menjëherë fitoren.
Senatori republikan i Iowa-s, Chuck Grassley – kryetar i Komitetit Gjyqësor të Senatit – shkroi në X se Blanche kishte treguar “durim, dhembshuri dhe këmbëngulje të jashtëzakonshme” gjatë procesit të emërimit.
“Nuk ka dyshim se ai është i kualifikuar”, shkroi Grassley.
Blanche ishte tashmë zëvendësprokuror i përgjithshëm kur mori drejtimin e përkohshëm të institucionit në prill, pas shkarkimit të Pam Bondit.