Irani ka dënuar sulmet ajrore të kryera nga Shtetet e Bashkuara të Amerikës dhe Britanisë së Madhe në Jemen.
“Kjo luftë e pajustifikuar shkel sovranitetin e Jemenit, ligjin ndërkombëtar, Kartën e OKB-së dhe rezolutat e Këshillit të Sigurimit, duke rrezikuar paqen dhe sigurinë rajonale”, tha Misioni i Përhershëm i Iranit në Kombet e Bashkuara në një deklaratë të premten e postuar në X.
Irani kritikoi “veprimet e paligjshme” të ShBA-së dhe Britanisë së Madhe, duke thënë se “kundërshtimi i tyre ndaj amendamenteve të Rusisë në rezolutë lë të kuptohet për një qëllim të paramenduar për të kryer këtë agresion”.
Hossein Amir-Abdollahian, ministri i jashtëm i vendit, kritikoi gjithashtu sulmet, duke shkruar në X, “Në vend të një sulmi ushtarak ndaj Jemenit, Shtëpia e Bardhë duhet të ndalojë menjëherë të gjithë bashkëpunimin ushtarak dhe të sigurisë me Tel Aviv kundër popullit të Gazës në mënyrë që siguria të kthehet në të gjithë rajonin.”
Ushtria e ShBA-së dhe e Mbretërisë së Bashkuar nisën sulme kundër objektivave Houthi në zonat e kontrolluara nga Houthi të Jemenit të enjten, kjo pasi administrata Biden dhe aleatët e saj paralajmëruan se grupi militant i mbështetur nga Irani do të mbante pasojat e sulmeve mbi anijet e transportit komercial në Detin e Kuq.
Presidenti i ShBA-së Joe Biden tha se ai urdhëroi sulmet “si përgjigje të drejtpërdrejtë ndaj sulmeve të paprecedentë të Houthi kundër anijeve detare ndërkombëtare në Detin e Kuq”.