Rusia ka furnizuar Korenë e Veriut me më shumë se një milion fuçi naftë që nga marsi i këtij viti, sipas një analize të imazheve satelitore nga Qendra Britanike me Burim të Hapur, një organizatë e pavarur kërkimore.
Sipas analizës, nafta po përdoret për të paguar armët dhe ushtarët e dërguar nga Pheniani në Moskë për të mbështetur luftën në Ukrainë, thanë ekspertët dhe sekretari i jashtëm britanik David Lammy për BBC.
Transferimet shkelin sanksionet e OKB-së, të cilat ndalojnë shitjen e naftës Koresë së Veriut, përveç në sasi minimale, për të kufizuar zhvillimin e saj të një programi bërthamor.
Imazhet satelitore, të shpërndara ekskluzivisht me BBC-në, tregojnë mbërritjen e cisternave të Koresë së Veriut në një terminal në Lindjen e Largët Ruse deri në 43 herë në tetë muajt e fundit. Cisternat janë regjistruar duke mbërritur bosh dhe duke u larguar pothuajse plot.
Nafta është çelësi për aparatin ushtarak të Koresë së Veriut
Koreja e Veriut, e cila lejohet të marrë një maksimum prej 500,000 fuçi nafte të rafinuar në vit nën sanksionet e OKB-së, konsumon dukshëm më shumë – rreth nëntë milionë fuçi në vit. Analistët pohojnë se nafta e furnizuar nga Rusia ka stabilizuar ekonominë e vendit, duke mundësuar menaxhimin më të lehtë të ushtrisë dhe prodhimin e municioneve.
Ekspertët paralajmërojnë se këto transferime janë pjesë e një bashkëpunimi gjithnjë e më të ngushtë midis Moskës dhe Phenianit. “Kjo është naftë për raketat, artilerinë dhe ushtarët,” tha Hugh Griffiths, ish-kreu i panelit të monitorimit të sanksioneve të OKB-së.