Shkrimtari dhe analisti Ilir Morina ka shprehur keqardhjen e tij të thellë për dëmet që po shkaktohen nga reshjet e mëdha dhe vërshimet në vend, duke paralajmëruar se këto dukuri do të përsëriten dhe mund të jenë edhe më të rrezikshme në të ardhmen.
Sipas Morinës, zgjidhja nuk është thjesht reagimi pas katastrofës, por krijimi i një strategjie dhe plani veprimi dhjetëvjeçar, me projekte konkrete, investime dhe zbatim rigoroz të ligjit. Ai thekson se infrastruktura e dobët, ndërtimet pa kritere, grumbullimi i mbeturinave dhe kanalizimet e bllokuara kanë sjellë situatën katastrofike që po përjetohet sot.
“Çdo leckë, shishe plastike apo mbeturinë që secili prej nesh hedh në vend jo adekuat kontribuon në bllokimin e sistemeve të kullimit të ujit,” thekson Morina, duke nënvizuar përgjegjësinë e qytetarëve.
Ai apelon gjithashtu për planifikim urban dhe ndërtim të bazuar në kritere klimatike dhe natyrore, duke ndaluar ndërtimet në rrafshinat pranë lumenjve dhe tokat bujqësore, dhe duke privilegjuar zhvillimin në zona kodrinore.
“Parandalimi është më i lirë dhe më efektiv se sanimi i dëmeve apokaliptike, që tashmë kanë arritur shifra prej qindra milionë eurosh dhe janë të vështira për t’u riparuar,” thekson Morina, duke nënvizuar rëndësinë e bashkëpunimit me ekspertë vendorë dhe ndërkombëtarë për të parandaluar katastrofat e ardhshme.
“Natyra na duhet neve, ndërsa ne asnjëherë nuk i kemi qenë të domosdoshëm asaj,” përfundon ai, duke bërë thirrje për veprim të menjëhershëm.