Si pasojë e temperaturave të larta, ekspertët kanë paralajmëruar mbi rreziqet vdekjeprurëse të ekspozimit ndaj diellit, të cilat mund të paraqiten pas vetëm 10 minutash qëndrimi jashtë.
Ekspertët kanë thënë për “DailyMail” se simptomat alarmuese nga të nxehtit ekstrem, mbi 32 gradë Celsius, mund të fillojnë brenda disa sekondave, duke përfshirë djersitjen, rrahjet e shpejta të zemrës dhe dehidrim.
Në vetëm pesë deri në 10 minuta, si pasojë e të nxehtit, gjaku tërhiqet nga organet vitale si truri, duke shkaktuar konfuzion, marramendje dhe humbje të vetëdijes.
Sapo dilni jashtë, dielli rrezatohet në lëkurë dhe ka të ngjarë të djersiteni.
Djersitja, ose prodhimi i djersës, është mënyra që organizmi apo trupi përdor për të ftohur veten. Ndërkohë që trupi ndjen temperaturat e nxehta, hipotalamusi apo pjesa e trurit që rregullon temperaturën sinjalizon gjëndrat në lëkurë që të prodhojnë djersë.
Ky lëng, i cili përbëhet kryesisht nga uji, por përmban edhe sasi të vogla kripe, largon nxehtësinë nga trupi dhe e ftohë atë derisa avullohet në lëkurë.
Në rastet e nxehtësisë ekstreme, djersa mund të avullohet nga lëkura në vetëm dy minuta.
Dhe në përpjekje për të vazhduar ftohjen, trupi fillon një proces të quajtur vazodilim, gjatë të cilit enët e gjakut zgjerohen dhe qarkullimi i gjakut rritet.
Ky proces mund të zgjasë djersitjen për disa minuta shtesë, pas së cilës djersa zakonisht ndalet.
“Në pesë minuta zemra fillon të rrahë më shpejtë”, shpjegon Kristy Ziontz, drejtoreshë e Qendrës Mjekësore “Hackensack Meridian Bayshore” në New Jersey.
Kjo ndodh për shkak se presioni i gjakut bie dhe zemra duhet të pompojë më fort.
Sipas Qendrës për Kontrollin dhe Parandalimin e Sëmundjeve të SHBA-së, CDC, rreziku nga i nxehti paraqitet vetëm pas 10 deri në 15 minuta, përveç nëse ndërmerren hapa jetik si konsumi i ujit dhe elektroliteve, kufizimi i ekspozimit të drejtpërdrejtë në diell dhe shmangia e aktiviteteve siç është stërvitja.
Uji dhe elektrolitet ndihmojnë trupin që të rifitojë lëngjet e humbura nga djersitja, ndërsa kufizimi i ekspozimit në diell parandalon djegien e lëkurës.
Në rast të mos konsumit të ujit apo lëngjeve të tjera, gjaku dhe oksigjeni tërhiqen nga organet vitale duke shkaktuar lirimin e toksinave dhe baktereve nga zorra dhe aktivizimin e qelizave të bardha të gjakut.
Ndërkohë që qelizat e bardha të gjakut sulmojnë këto baktere, në anën tjetër formohen edhe mpiksje gjaku, duke rritur me shpejtësi rrezikun e dështimit të shumë organeve.
Megjithatë, ekspertët shëndetësorë theksojnë se ky reagim ekstrem i organizmit zakonisht ndodh në situata shumë të rënda, dhe kategoritë më të rrezikuara janë fëmijët dhe të moshuarit.