Analisti i sigurisë, Hysen Gecaj, i ftuar në “Arb Debat” në TV Arbëria me Rid Berishën, ka folur për marrëveshjen trilaterale mes Kosovës, Shqipërisë dhe Kroacisë, në fushën e mbrojtjes.
Ai ka thënë se kjo marrëveshje është një avancim drejt bashkëpunimit midis këtyre tri shteteve.
“Faktikisht, e shoh si një avancim drejt bashkëpunimit të këtyre tri shteteve mes vete në këtë periudhë edhe po them edhe për faktin që në një farë mënyre ose tjetër, këto shtete kanë bashkëpunuar në të kaluarën. Sidomos ka pasur një bashkëpunim të mirë mes Republikës së Kosovës dhe Kroacisë, pra FSK-së konkretisht dhe Ushtrisë kroate, ku Ushtria kroate ka ofruar një mbështetje të jashtëzakonshme në shkollimin e kuadrave të FSK-së në Akademinë Ushtarake të Kroacisë, prej nga një numër i konsiderueshëm i pjesëtarëve të FSK-së janë trajnuar dhe ushtruar atje. Kështu që ky bashkëpunim është i hershëm sa i përket Kosovës dhe Kroacisë, pa e përmendur kohën e luftës, ku një numër i madh i shqiptarëve kanë dhënë kontribut të jashtëzakonshëm për çlirimin e Kroacisë”, ka thënë ai në “Arb Debat.”