Përgjatë vitit 2024, deputetët e Kuvendit të Kosovës morën shuma të konsiderueshme parash në emër të shpenzimeve për udhëtime, ndonëse vitin e kaluar ishin zotuar se do të heqin dorë nga ky përfitim. Hulumtimi i emisionit “Interaktiv Talks” të gazetarit Xhemajl Rexha, ka zbuluar se shumica e deputetëve kanë vazhduar të marrin shuma të mëdha për udhëtime, sidomos për karburant.
Një nga të përfshirët në këtë praktikë është deputeti Arbër Rexhaj, i cili, pavarësisht se udhëton nga Prizreni, ka marrë 810 euro për shpenzimet e tij për të ardhur në Prishtinë.
Po ashtu, deputeti Haxhi Avdyli nga Guxo ka përfituar 690 euro gjatë vitit të kaluar për udhëtimet e tij nga Prizreni, ndërkohë që Dimal Basha nga Ferizaj ka marrë 680 euro për shpenzimet e udhëtimeve, ndërsa Valon Ramadani i Ferizajt ka marrë 590 euro.
Për deputeten Arbëresha Kryeziu Hyseni, udhëtimi nga Gjilani ka rezultuar në një shpenzim prej 510 euro.