38 pasagjerë vdiqën të mërkurën pasi një avion i “Azerbaijan Airlines” u rrëzua teksa po tentonte të bënte një ulje emergjente pranë qytetit Aktau në Kazakistan.
Burimet e qeverisë së Azerbajxhanit kanë konfirmuar për Euronews të enjten se një raketë ruse tokë-ajër e shkaktoi rrëzimin e avionit.
Sipas burimeve, raketa shpërtheu pranë avionit gjatë një aktiviteti ajror me dron mbi Grozny dhe copëzat i goditën pasagjerët dhe ekuipazhin e kabinës.
Burime qeveritare thanë se avioni i dëmtuar nuk u lejua të ulej në asnjë aeroport rus pavarësisht kërkesave të pilotëve për një ulje emergjente dhe u urdhërua të fluturonte përtej Detit Kaspik drejt Aktaut në Kazakistan.
Sipas të dhënave, sistemet e navigimit GPS të avionit u bllokuan gjatë gjithë fluturimit mbi det.