Ka nisur gjykimi për vrasjen e Liridona Ademajt. Gjyqtarja Fatime Dermaku pas leximit të aktakuzës ka pyetur të akuzuarit për identitetin e tyre, adresat dhe gjendjen statusore të tyre.
I pari që u ngrit në këmbë ishte Naim Murseli, ish-bashkëshorti i Liridonës, i cili në pyetjen nga gjyqtarja se a je i martuar, ai deklaron se: “kam gruan e vrarë”, transmeton IndeksOnline.
Aktualisht në Gjykatën Themelore në Prishtinë po mbahet seanca e shqyrtimit fillestar për rastin e vrasjes së Liridones. Në sallën e gjyqit ka masa të rrepta sigurie dhe interesim të madh të medias për ta mbuluar ngjarjen e cila kishte tronditur opinionin një vit më parë.
Deri tani, tre të akuzuarit, Murseli, Kokalla dhe Plava, ndodhen në paraburgim, ndërsa për Dodajn, i cili dyshohet se ka shitur armën dorasit, është vendosur të lirohet pasi Gjykata Supreme ndërpreu masën e paraburgimit ndaj tij.