Një paketë e re ndihme sigurie nga Gjermania tashmë është dorëzuar në Ukrainë.
Qeveria gjermane zbuloi përmbajtjen e paketës së fundit, duke përditësuar listën përkatëse të artikujve të dhuruar më 29 korrik, raporton Ukrinform, përcjell Telegrafi.
Si pjesë e një projekti të përbashkët me Danimarkën, u dorëzuan tetë tanke luftarake kryesore LEOPARD 1 A5 me pjesë rezervë (më parë ishin transferuar 50 njësi të këtyre tankeve).
Gjithashtu, 21,000 fishekë për armë kundërajrore GEPARD janë siguruar nga Bundeswehr dhe rezervat industriale (tashmë janë dorëzuar gjithsej 176,000).
Në paketë përfshihen gjithashtu 10 dronë (përveç 30 atyre të dorëzuar më parë), dy automjete të blinduara Bergepanzer 2 me pjesë rezervë (më parë ishin 19 njësi), 10 radarë tokësorë (në total, Forcat e Armatosura të Ukrainës kanë marrë 66), pothuajse 25,000 helmeta dhe një spital fushor (një spital tjetër i tillë ishte siguruar më parë).