Dhjetë persona janë arrestuar dhe mbi 20 automjete janë konfiskuar gjatë një operacioni kundër kontrabandës me mallra, dje në veri të Kosovës. Vlera e mallrave të dyshuara për kontrabandë vlerësohet të jetë mbi 200 mijë euro.
Zëvendësdrejtori i Policisë së Kosovës për rajonin e veriut, Veton Elshani, ka dhënë detaje për aksionin e zhvilluar të enjten në 22 lokacione në katër komunat veriore.
Ai ka bërë të ditur se hetimet kanë nisur para gjashtë muajsh, bazuar në informacionet e mbledhura nga Policia e Kosovës dhe Agjencia Kosovare e Inteligjencës (AKI).
Operacioni është zhvilluar në bashkëpunim me Administratën Tatimore të Kosovës dhe Doganën e Kosovës, nën mbikëqyrjen e Prokurorisë Themelore në Mitrovicë.
Sipas Elshanit, nëntë lokacione janë kontrolluar në Mitrovicën e Veriut, nga pesë në Zveçan dhe Zubin Potok, si dhe tri në Leposaviq.
Ai ka konfirmuar se dhjetë persona të dyshuar janë dërguar në stacion policor, ndërsa në disa lokacione kontrollet kanë vazhduar për shkak të sasisë së madhe të mallrave.
“Deri tani ne kemi sjellë në stacion 10 persona të cilët konsiderohen të arrestuar, si të dyshuar lidhur me rastin në fjalë. Pas intervistimit, prokurori do të vendosë se si të veprohet tutje”, ka thënë Elshani për KosovaPress.
Përveç mallrave, gjatë operacionit janë konfiskuar mbi 20 mjete motorike, përfshirë vetura, xhipa dhe dy kamionë.
“Konsiderojmë që vlera e përgjithshme është diku mbi 200 mijë euro. Sidoqoftë, ne kemi mbi 20 mjete motorike, duke filluar prej veturave, xhipa, dy kamionë, që janë konfiskuar me urdhër të prokurorit”, ka deklaruar Elshani.
Në mesin e mallrave të gjetura janë tekstile, barna, produkte ushqimore dhe artikuj të tjerë.
Elshani ka zbuluar edhe një skemë të dyshuar të kontrabandës, sipas së cilës mallrat transportoheshin nga Serbia përmes pikës kufitare në Bërnjak drejt Mitrovicës së Veriut. Më pas, dyshohet se pajiseshin me dokumentacion që krijonte përshtypjen se ishin blerë në Mitrovicë, për t’u shitur më pas në Prishtinë.
“Janë të gjitha kategoritë e mallrave, prej tekstilit, barna, gjëra ushqimore dhe të tjera. […] Dyshimet janë që ai mall po merret në Mitrovicë dhe mandej shkon e shitet në Prishtinë. Ky si fenomen është me interes”, ka theksuar Elshani.
Ndërkohë, zëdhënësi i Prokurorisë Themelore në Mitrovicë, Valon Preteni, ka konfirmuar për KosovaPress se rasti po trajtohet në procedurë të rregullt.
“Rasti trajtohet në procedurë të rregullt”, ka thënë Preteni. /Kosovapress