Faton Ramadani ka publikuar një reagim të fortë publik, duke pretenduar se prova të rëndësishme për një rast kriminal në Kosovë nuk kanë humbur, siç ishte deklaruar më herët nga organet e drejtësisë, por janë fshehur qëllimisht për të mbuluar autorët e vërtetë.
Sipas Ramadanit, bëhet fjalë për prova që datojnë prej më shumë se dy dekadash, për të cilat prokurori dhe gjykata kishin deklaruar zyrtarisht se janë zhdukur. Ai thekson se, pas 24 vitesh, këto prova janë siguruar dhe dalin në dritë, duke ngritur dyshime serioze për manipulim dhe ndërhyrje në procesin e drejtësisë.
Në reagimin e tij, Ramadani ngre pyetjen se si është e mundur që struktura të caktuara të kenë arritur të ndikojnë në mbylljen e një rasti të tillë, duke përfshirë – sipas tij – edhe elementë të drejtësisë ndërkombëtare.
Ai pohon se publikimi i këtyre materialeve dëshmon se provat nuk kanë qenë kurrë të humbura, por janë mbajtur të fshehura për të justifikuar dënimin e personave të pafajshëm dhe për të mbrojtur autorët realë të krimit.
Në mbështetje të pretendimeve të tij, Ramadani ka publikuar edhe dokumente që lidhen me një raport të United Nations Mission in Kosovo, konkretisht një raport identifikimi forenzik i përpiluar nga Njësia Forenzike në Prishtinë.
Sipas dokumentit, i cili mban datën gusht 2001, janë analizuar mostra të ndryshme materiale të gjetura në një vendngjarje në Terstenik, përfshirë kanaçe alumini dhe shishe birre “Efes”. Raporti thekson se gjatë ekzaminimeve nuk janë zbuluar gjurmë latente të identifikueshme, pavarësisht përdorimit të metodave të ndryshme forenzike.
Në raport përmenden edhe disa persona të dyshuar, fotografitë dhe gjurmët e gishtave të të cilëve janë marrë për krahasim nga stacioni policor në Gllogoc.
Megjithatë, Ramadani pretendon se ekzistojnë materiale dhe prova të tjera që janë mbajtur të fshehura dhe që nuk janë trajtuar siç duhet nga organet e drejtësisë.
Ai kritikon ashpër mungesën e reagimit institucional, duke theksuar se nuk ka asnjë prokuror që guxon të rihapë rastin, pavarësisht – sipas tij – fakteve të reja që janë bërë publike.
“Në një shtet ligjor, një zhvillim i tillë do të konsiderohej skandal dhe rasti do të rihapej brenda 24 orëve,” shprehet Ramadani, duke shtuar se në Kosovë raste të tilla shpesh kalojnë pa përgjegjësi institucionale.
Në fund, ai paralajmëron se publikimi i mëtejshëm i këtyre fakteve mund të sjellë presione dhe forma të ndryshme shantazhi, duke akuzuar se prokuroria mund të përdoret edhe për qëllime të tilla.