Meta ka njoftuar të martën një përditësim të ri të algoritmit të Facebook, i cili synon të personalizojë më tej përvojën e përdoruesve përmes shtimit të videove Reels të përshtatura sipas preferencave individuale.
Ndryshimet sjellin funksione të reja që rrisin kontrollin e përdoruesve mbi përmbajtjen që u shfaqet në platformë. Tashmë, përdoruesit mund të zgjedhin opsionin “nuk jam i interesuar” për videot që nuk i pëlqejnë, duke ndihmuar algoritmin të kuptojë më mirë preferencat e tyre.
Po ashtu, funksioni “Ruaj” është përmirësuar, duke e bërë më të lehtë organizimin e Reels dhe postimeve të preferuara në një vend të vetëm.
Sipas kompanisë, përditësimi vjen si përgjigje ndaj ankesave për përmbajtje mashtruese, bezdisëse ose të prodhuara nga inteligjenca artificiale me cilësi të ulët.
Ndër të tjera, Meta ka bërë të ditur se përdoruesve do t’u shfaqen 50% më shumë Reels të ngarkuara brenda ditës, me qëllim që përmbajtja të jetë sa më e freskët dhe relevante.
Kompania ka njoftuar gjithashtu lançimin e “Vibes”, një burim i ri videosh të shkurtra që përmban ekskluzivisht përmbajtje të gjeneruar nga AI, duke theksuar investimin e vazhdueshëm në teknologji dhe përmbajtje të avancuar digjitale.