Shërbimet e urgjencës janë në gatishmëri nga përmbytjet në Evropën Qendrore dhe Lindore pasi reshjet e rrëmbyeshme frynë lumenjtë dhe dëmtuan mijëra shtëpi.
Stuhia “Boris” ka dalë të jetë fatale në Rumani. Katër persona kanë humbur jetën në rajonin e Galatit.
Në Republikën e Çekisë, janë evakuuar 51 mijë familje në zonat veriore të shtetit që po ashtu janë goditur nga ndërprerjet e rrymës.Polonia ka bërë evakuime në zonën afër kufirit me Çekinë, raporton BBC.
“Edhe një herë po përballemi me efektet e ndryshimit klimatik, që po rriten dukshëm në kontinentin evropian, me pasoja dramatike”, ka thënë presidenti rumun Klaus Iohannis të shtunën.
Kryetari i një fshati në rajonin Galati të Rumanisë ka bërë të ditur se 700 shtëpi janë përmbytur.
“Kjo është katastrofë e përmasave të tmerrshme”, ka thënë Emil Dragomir.
Në Glucholazy, në rajonin jugperëndimor të Polonisë, Opole, zjarrfikësit grumbulluan thasë me rërë ndërsa banorët u evakuuan.
Një përpjekje e ngjashme po zhvillohet në Krakov, qyteti i dytë më i madh i Polonisë, ku banorëve u janë ofruar thasë me rërë për mbrojtje nga përmbytjet.
Në qytetin e Wroclaw mijëra banorëve iu desh të përdornin shkallët e blloqeve të larta sepse ashensorët u mbyllën si një masë paraprake e sigurisë nga përmbytjet, raportuan mediat lokale.
Në Republikën Çeke, një digë shpërtheu të shtunën në rajonin e Bohemisë Jugore të vendit. Ministri i Mjedisit Petr Hladik u kërkoi atyre në zonat më të goditura të përgatiten për të lënë shtëpitë e tyre.
Kryeministri çek Petr Fiala tha se vendi po përgatitet për “një fundjavë të vështirë”. Autoritetet kanë ngritur mure mbrojtëse me thasë rëre dhe barriera metalike. Ndeshjet e futbollit në dy ligat kryesore të vendit të planifikuara për këtë fundjavë u anuluan.