Energjia në Kosovë dhe rreziku i reduktimeve, sfidat që po afrohen

Shkruan: Emine Krasniqi

Kosova vazhdon të përballet me sfida serioze në sektorin e energjisë elektrike, duke rikthyer frikën e reduktimeve të mundshme, sidomos gjatë periudhave me konsum të lartë. Varësia e madhe nga prodhimi vendor me kapacitete të vjetruara dhe nevoja për import të energjisë po e bëjnë sistemin energjetik të brishtë dhe të ndjeshëm ndaj luhatjeve të tregut.

Termocentralet kryesore të vendit, Kosova A dhe Kosova B, vazhdojnë të jenë shtylla kryesore e prodhimit, por mosha e tyre dhe defektet e shpeshta teknike shpesh ndikojnë në uljen e kapaciteteve prodhuese. Çdo dalje jashtë funksionit e ndonjë blloku prodhues e detyron vendin të mbështetet në import, i cili shpesh është shumë më i shtrenjtë.

Rritja e konsumit, sidomos gjatë dimrit dhe verës, kur përdorimi i ngrohjes dhe ftohjes është më i lartë, e rëndon edhe më tej situatën. Në këto kushte, institucionet energjetike paralajmërojnë se në rast të mungesës së prodhimit vendor dhe çmimeve të larta në tregjet ndërkombëtare, reduktimet mbeten një mundësi reale.

Një tjetër problem mbetet menaxhimi dhe humbjet në rrjet, si dhe mungesa e investimeve të mjaftueshme në burime alternative të energjisë. Edhe pse ka pasur përpjekje për të rritur prodhimin nga energjia diellore dhe ajo e erës, këto ende nuk janë në nivel të mjaftueshëm për të zëvendësuar varësinë nga thëngjilli.