Ndonëse numri i infektimeve me COVID është dyfishuar, siç e konfirmon edhe së fundmi ISHP, interesi i qytetarëve për t’u vaksinuar Shqipëri është pothuajse i papërfillshëm.
Në një qendër shëndetësore numri i qytetarëve që paraqiten për të aplikuar vaksinën kundër COVID shkon 1-2 persona, kryesisht të moshuar.
Arjana Mulgeci, infermiere QSH.8 shprehet se numri i vaksinimeve mbetet shumë i ulët.
“Numri i vaksinimeve mbetet shumë i ulët edhe pse ka pasur rritje të infektimeve. Sëmundjet që po qarkullojnë së fundi si covid, viroza etj, ka filluar të vë pak në lëvizje qytetarët. Aktualisht paraqiten 1 deri në 2 qytetarë në ditë për vaksinim ndaj covid”, deklaron infermierja.
Qytetarët ndihen të frikësuar nga vala e re e infektimeve, por edhe të paqartë nëse duhet apo jo të aplikojnë vaksinën dy valente që disponojnë qendrat shëndetësore për nënvariantet e Omicronit BA.4 dhe BA.5 që kanë qenë në qarkullim më herët.
