Kandidati i Partisë Republikane për zgjedhjet presidenciale në Amerikë, Donald Trump, ka deklaruar se SHBA-të, nën drejtimin e tij do të jenë të përkushtuara maksimalisht pro NATO-së, për aq kohë sa shtetet evropiane marrin përgjegjësi të plotë financiare për zhvillimin Aleancës.
Në një intervistë për Nigel Farage, për kanalin televiziv britanik GB News, ai e ka ripohuar angazhimin e tij për aleancën transantliantike, mirëpo kjo nuk mund të ndodhë si në të kaluarën kur vendet evropiane përfitonin nga mbështetja dhe siguria që ua ofronte Amerika. “NATO duhet të trajtojë SHBA-në me drejtësi, sepse nëse nuk është për Shtetet e Bashkuara, NATO fjalë për fjalë as nuk ekziston”, tha ndër të tjera Trump, raporton politico.eu.
Gjatë kohës sa ishte president, Donald Trump, ishte dalluar me kritikat e tij ndaj shteteve evropiane, se pse e nuk e plotësonin kriterin prej 2% të GDP-së për mirëmbajtën e Aleancës. Shteti që ishte në halë në sy për Donald Trumpin në këtë drejtim ishte Gjermania. Sipas ish presidentit amerikan, Berlini përfiton nga siguria e Uashingtonit, por që në të njëjtën kohë ka marrëdhënie të shkëlqyera me Rusinë e Putinit, e cila është armike e Aleancës.
Kohë më parë, Dondald Trump, e kishte tronditur opinionin, gjatë një marshi politik në Karolinën e Jugut, duke e cituar presidentin e një “shteti të madh”, që nuk ia ka përmendur emrin, duke e pyetur atë, “Zotëri, nëse ne nuk paguajmë, dhe sulmohemi nga Rusia, a do të na mbroni?” “I kam thënë: ‘Nuk keni paguar? Jeni delikuent?’ Ai ka thënë: ‘Po, kështu ka ndodhur’. Jo, nuk do t’ju mbroj juve. Në fakt do t’i inkurajoja ata të bëjnë çfarë të duan. Duhet të paguani”, kishte deklaruar ndër të tjera Trump.
Shtëpia e Bardhë i konsideroi “të tmerrshme” këto komente të Trumpit për Rusinë dhe NATO-n. Kurse shumë përfaqësues të shteteve të NATO-së, deklaruan se pohime të tilla mund të jenë inkurajim për Putinin.
/TV Arbëria