Departamenti i Drejtësisë dhe këshilltari special i SHBA-së, Jack Smith janë në diskutime rreth mbylljes së ndjekjeve penale federale kundër Donald Trump, raporton The Guardian.
Smith aktualisht është duke udhëhequr çështje të shumta kundër Trump, i cili do të bëhet presidenti i parë që do të marrë detyrën ndërsa disa çështje kundër tij janë në pritje.
Sipas The Guardian prokurorët e posaçëm do të mbyllin çështjet e tyre penale kundër Donald Trump përpara se ai të marrë detyrën.
Këto përfshijnë një rast mbi keqpërdorimin e supozuar të dokumenteve të klasifikuara dhe një për përpjekjet e tij për të përmbysur humbjen e tij në zgjedhjet e vitit 2020 ndaj Joe Biden.
Departamenti i drejtësisë po shqyrton ende se si të mbyllen çështjet, të cilat janë në faza të ndryshme dhe janë të komplikuara. Në veçanti, departamenti nuk dëshiron që çështja e dokumenteve të klasifikuara, e cila u pushua dhe aktualisht është në ankim, të kalojë e pakundërshtuar.
Trump ka thënë disa herë se planifikon të shkarkojë Smithin dhe t’i japë fund çështjeve federale kundër tij.