Gjykata Themelore në Prishtinë ka vendosur në çështjen penale kundër të akuzuarve L.S, A.S, I.S dhe ndaj një të mituri të akuzuar për “Vrasje të rëndë” dhe “Vrasje e rëndë në bashkëkryerje”.
I akuzuari L.S është shpallur fajtor dhe është dënuar me dënim unik me burgim në kohëzgjatje prej tridhjetë vjet për veprat penale “Vrasje e rëndë” dhe “Mbajtja në pronësi, kontroll ose posedim të paautorizuar të armëve”, i cili dënim do të ekzekutohet 15 ditë pas plotfuqishmërisë së këtij aktgjykimi.
I akuzuari A.S është shpallur fajtor dhe është dënuar me dënim me burgim në kohëzgjatje prej pesë vjet burgim, për veprën penale “Lëndim i lehtë trupor”, i cili dënim do të ekzekutohet 15 ditë pas plotfuqishmërisë së këtij aktgjykimi. Ndërsa, i akuzuari A.S. është liruar për veprën penale “Vrasje e rëndë në bashkëkryerje”.
I akuzuari I.S është shpallur fajtor dhe është dënuar me dënim unik me burgim në kohëzgjatje prej 2 e 4 muaj, për veprat penale “Sulmi dhe Mbajtja në pronësi, kontroll ose posedim të paautorizuar të armëve”, i cili dënim do të ekzekutohet 15 ditë pas plotfuqishmërisë së këtij aktgjykimi.
I mituri është shpallur fajtor për veprën penale” Lëndim i lehtë trupor”, dhe gjykata i shqiptoj masën e dërgimit në institucion edukativo-korrektues në kohëzgjatje prej tetë muaj. Ndërsa, i mituri është liruar për veprën penale “Vrasje e rëndë në bashkëkryerje”.
Të akuzuarve L.S, I.S dhe A.S do iu llogaritet edhe koha e kaluar në paraburgim, ndërsa të akuzuarit L.S, i është vazhduar masa e paraburgimit deri në plotfuqishmëri, por jo më gjatë se dënimi i shqiptuar me burgim prej 30 vite.