Shkruan: Agron Hoti
Asgjë s’e kishte goditur më shumë komunizmin në glob që po drejtohej nga BRSS sesa normalizimi i raporteve SHBA-Kinë në fillim të viteve të 70-ta, prej nga ku Kina më pas vetëm formalisht pati mbetur komuniste, gjersa praktikisht po e hapte ekonominë duke u bërë gjithnjë e më kapitaliste. Si rezultat i hapjes, Kina në vitin 1978 kishte nxjerrë nga varfëria afro 800 milionë qytetarë të saj.
Heqja dorë joformalisht e Kinës në vite të 70-ta nga ekonomia e centralizuar për të ecur drejt një ekonomie tregu sforcoi lidhjet ekonomike të Kinës me SHBA, Azi Lindore dhe Juglindore. Ishte pikërisht ky përafrim sino-amerikan ai që ndali Luftën e Vietnamit dhe paqëtoi Pacifikun. E ky përafrim ishte goditje fatale për BRSS-në, ngase kjo e fundit kishte ngelur tanimë i vetmuar për ta shtrirë komunizmin në glob.
Dhe lufta Afganistan që zgjati nga 1979 deri në 1989 ku BRSS dëshpërimisht u mundua të mbante qeveri komuniste në Afganistan vetëm sa e përshpejtoi rënien e BRSS-së bashkë me të edhe të vetë komunizmit.
Edhe tash kur Rusia po mundohet ta pushtojë tërë Ukrainën, SHBA ka filluar të ndërtojë partneritete e aleanca në Azi për ta lënë Rusinë të vetme në Ukrainë. Një Rusi që has në rezistencë nga Evropa në perëndim të saj dhe në lindje që s’e ka mbështetjen e Kinës dhe Japonisë është shumë më e lehtë për t’u trajtuar nga SHBA.
Shtytës i përafrimit sino-amerikan është fillimi i rënies ekonomike të Kinës sidomos pas Covid 19. Për të njëjtat arsye të rënies ekonomike Kina në fillim të viteve të 70-ta e kishte lënë BRSS-në pa mbështetje duke u orientuar së paku ekonomikisht kah Perëndimi.
Duke qenë se Kina historikisht e ka pasur Rusinë si njërin ndër rivalët e saj kryesorë, duke qenë se lidhjet ekonomike me Perëndimin i ka shumë më të fuqishme sesa me Rusinë, atëherë Kina ka shumë pak interes që ta mbështesë Rusinë në Ukrainë.
Prandaj, një pako investimesh perëndimore, do ta bëjnë Kinën – ekonomia e së cilës është në rënie – që ta ndërpresë bashkëpunimin ushtarak me Rusi. Sigurisht që manovrat ushtarake të Kinës në Detin e Kinës Jugore janë më shumë për konsum të brendshëm për të ngjallur nacionalizëm si instrument ky i njohur për të siguruar mbështetje gjithëpopullore në një kohë kur kriza e rënies ekonomike ka filluar t’i japë efektet e para (p.sh. rënia e investimeve të huaja).
Prandaj, Blinken , përmes vizitës në Kinë, do të përpiqet që ta forcojë lidhjen sino-amerikane në mënyrë që Kina ta ndërpresë bashkëpunimin ushtarak me Rusi.
/TV Arbëria