Zëvendëspresidentja Kamala Harris dhe ish-Presidenti Donald Trump po marrin dy rrugë të ndryshme për t’u përgatitur për debatin e tyre presidencial të 10 shtatorit, raporton CNN.
Java që çon në debatin, i cili do të organizohet nga ABC News në Filadelfia, përfaqëson shansin e fundit të kandidatëve për të vendosur agjendën përpara se të takohen. Mund të ofrojë gjithashtu një pamje paraprake të sulmeve që të dy do t’i rrafshojnë kundër njëri-tjetrit.
Që kur presidenti Joe Biden u tërhoq nga gara dhe miratoi kandidaten e tij më shumë se pesë javë më parë, Trump është përpjekur të arrijë në një mesazh për ta zbutur momentin e Harrisit. Ish-presidenti ka testuar sulme personale dhe pseudonime, ka kritikuar mungesën e konferencave të saj për shtyp dhe intervistave, ka fajësuar politikat e administratës Biden për inflacionin dhe kostot e larta dhe ka goditur Harris dhe Biden për tërheqjen e vitit 2021 nga Afganistani që la të vdekur 13 anëtarë të shërbimit amerikan.
Ndërkohë, Harris është fokusuar në moderimin e shumë prej pozicioneve që ajo i shtroi gjatë fushatës së saj presidenciale demokratike 2019. Në një intervistë javën e kaluar me CNN, e para e saj që kur u bë kandidate e demokratëve, ajo argumentoi se vlerat e saj kanë mbetur të njëjta.
Harris po planifikon gjithashtu ta mbajë një fjalim në New Hampshire të mërkurën për ta zbuluar planin e saj ekonomik.
Gjatë debatit, kandidatëve do t’u ndalet zëri i mikrofonit kur nuk është radha e tyre për të folur. Fushata e Harrisit kërkonte heqjen e këtij rregulli, ndërsa ish-presidenti dhe ekipi i tij dërguan mesazhe kontradiktore për këtë çështje.