Shkruan: Afrim Kasolli
Për të shtunën në ora 15 është paralajmëruar një protestë qytetare kundër propozimit të ZRRE-së për shtrenjtimin e çmimit të energjisë elektrike. Ndërkohë, gjatë ditës së sotme disa persona kanë zhvilluar një aktivitet të paparalajmëruar kundër këtij vendimi dhe të cilat janë arrestuar nga Policia e Kosovës. Aksione të tillë po zhvillohen nën moton “asnjë cent më shumë”. Çfarë edhe është thirrja protestuese për të shtunën. Analistë të ndryshëm kanë shprehur kritikën e tyre ndaj propozimit për ngritjen e çmimit të rrymës deri në 15 për qind, me pretendimin se një akt i tillë do të kishte efekte fatale në ekonomi si dhe do ta përkeqësonte tej mase mirëqenien sociale të qytetarëve të Kosovës. Kundër këtij vendimi janë shprehur edhe partitë politike opozitare. Kurse, partia në pushtet pas një heshtje të gjatë nuk e ka kundërshtuar këtë plan.
E tërë kjo zallamahi po zhvillohet në prag të krijimit të institucioneve të reja të dalura nga zgjedhjet e 9 shkurtit, të cilat i fitoi Lëvizja Vetëvendosje. Madje shumë kush ka pohuar se vet fakti se vendimi për shtrenjtim të rrymës u mor vetëm pas përfundimit të zgjedhjeve, reflekton qasjen dinake dhe mashtruese të pushtetit aktual në mënyrë që kjo të mos i hakmerrej në vota.
Organizatorët e kësaj proteste kanë deklaruar se nuk kanë afërsi me asnjë parti politike dhe se protesta e tyre është spontane duke u nisur nga shqetësimi i përbashkët qytetar për këtë vendim. Pra një lloj modeli i reagimit që i ngjason revoltës qytetare në Serbi të prirë nga studentët e cila mori shkas pas rrëzimit të kulmit të Stacionit Hekurudhor në qytetin e Novi Sadit, në nëntor të vitit të kaluar, ku humbën jetën 16 persona.
Në këtë drejtim ekzistojnë ngjashmëri ndërmjet vendimit për shtrenjtimin e rrymës në Kosovë dhe asaj që ka ndodhur në rastin konkret në Serbi. Sepse edhe te ne ky vendim po merret me bekimin e pushtetit, për hir të interesave të kompanive ndërkombëtare që merren me distribuimin e rrymës e kundër interesave të qytetarëve, me argumentin se ato janë duke pësuar humbje financiare, ashtu sikur në Serbi që investimi i sipër përmendur ishte bërë shkel e shko vetëm nga shtysa për fitimet e jashtme, pavarësisht kostos së brendshme. Mirëpo, dallimi është se protestuesit në Serbi, për atë skandal e kanë bërë përgjegjës drejtpërdrejt regjimin e Aleksandër Vuciqit, kurse organizatorët e protestës te ne e kanë fokusuar zemërimin vetëm drejt ZRRE pa e adresuar përgjegjësinë e pushtetit të Albin Kurtit në këtë drejtim. Ndërkohë, partitë opozitare në anën tjetër kanë tentuar që çdo zemërim ta orientojnë ka Qeveria, por duke i amnistuar në masë të madhe kompanitë që merren me distribumin e rrymës. Një dallim tjetër ky, sepse privatizimi i këtij sektori, ndodhi në kohën kur Albin Kurti ishte në opozitë, por që tashmë është përshtatur për interesa të veta me këtë trashëgimi, kurse në Serbi çdo gjë është e lidhur me personalitetin e Alaksndër Vuciqit. Prandaj në rastin tonë, faji është më shumë “jetim”
Këto kundërthënie të sipër cekura ndërmjet organizatorëve të protestës që nuk kanë guxim të jenë kundër pushtetit aktual, për ta bërë atë si përgjegjës që po e mbron vendimin për shtrenjtimin e rrymës, si dhe një opozite që adreson kritika ndaj pushtetit, por nuk kanë guxim të dalin kundër presionit të kopamanive si KEDS, mund të merren si shenja jo ogur mira për protestën e së shtunës. Nuk ka dyshim se opozita ka interes ta dobësojë regjimin e Albin Kurtit, por deri më tani ajo nuk ka dhënë asnjë shenjë që është pro ndryshimit të parametrave në këtë sektor. Pra një dëshmi kjo, se si pushteti ashtu edhe opozita mund të jenë peng i të njëjtit pushtet ekonomik ndërkombëtar.
Ndërkohë, siç është dëshmuar kohën e fundit në Kosovë protestat me motive sociale dhe ekonomike e pa infrastrukturë partiake nuk kanë pasur sukses. Le të kujtojmë vetëm reagimet masive qytetare kundër demarkacionit me Malin e Zi, kundër Asociacionit, apo atë të organizuar nga nisma “Liria ka emër”, kundër Dhomave të Specializuara me seli në Hagë. Secila prej tyre në mënyrë të hapur ose të heshtur, kanë qenë aktivitete partiake.
Kështu, nëse protesta e shtunës do të marr përmasa masive (pa mbështetjen e partive opozitare), ajo do të ishte dëshmi e një ndryshimi të fshehur që ka ndodhur në shoqërinë tonë. Shenjë akumulimit të frustrimit qytetar si me pushtetin ashtu edhe me opozitën. Dhe se vendimi për shtrenjtimin e rrymës do shërbejë vetëm si zanafilla e një uragani, efektet e të cilit do të jenë tektonike në skenën politike. Kurse fitorja e Albin Kurtit në zgjedhjet e 9 shkurtit nuk paska qenë rezultat i pajtimit të qytetarëve me qeverisjen e tij, por vetëm thjeshtë se nuk ka pasur kush ta rrëzojë. /TV Arbëria