Një simbol i ri që po shfaqet në tanket dhe automjetet e blinduara ruse të përfshira në ofensivën e vazhdueshme pranë Kharkivit në Ukrainë sugjeron një rritje të konsiderueshme në aktivitetet ushtarake të Rusisë, sipas monitoruesit të inteligjencës me burim të hapur OSINT Defender.
Sipas mediave të huaja, përcjell Telegrafi, simboli i paparë më parë përbëhet nga një katror qendror me dy kryqe diagonale të mbivendosura.
Dhe kjo shenjë ka filluar të shfaqet në pajisjet ruse gjatë disa ditëve të fundit.
OSINT Defender raporton se simboli i ri mund të lidhet me ofensivën e rinovuar kufitare të Rusisë në verilindje të Ukrainës.
Grupet sulmuese të blinduara ruse po përpiqen të “shkelin” mbrojtjen e Ukrainës, veçanërisht rreth Vovchansk, ku forcat ruse janë parë duke hyrë në qytetin kufitar.
Në zonat e konfliktit, simbolet si këto shërbejnë kryesisht si masa identifikuese të mikut ose armikut (IFF), një mënyrë për të parandaluar zjarrin miqësor.
Kujtojmë se shenja më e spikatur ka qenë ‘Z’ që u shfaq në shumë automjete të blinduara ruse në fillim të pushtimit në vitin 2022 dhe vazhdoi të bëhej diçka si një simbol për rusët për të treguar mbështetje për përpjekjet e luftës.
“Shenjat janë thelbësore në luftime për të dalluar automjetet miqësore nga ato armike, veçanërisht në konflikte si ai në Ukrainë, ku të dyja palët mund të përdorin pajisje të ngjashme”, ka thënë Michael Pursell, një ushtarak amerikan në pension që tani jep mësim në Universitetin George Washington.
