Shkruan: Agron Hoti
Nëse së fundmi ka shpërthyer capcarraphane e vjedhjes së votave brenda LDK-së, kjo nuk do të thotë që partitë tjera janë më mirë, përkundrazi janë edhe më keq. Prandaj, nuk është fare i rastësishëm ky shpopullim i frikshëm i Kosovës, ku tanimë fshatra të tëra – pavarësisht se me standard pothuajse allamanesk apo zviceranesk – kanë ngelur fantazma të frikshme pa asnjë njeri në to.
Nuk ka shkollë në Kosovë, ku s’ka rënë numri i fëmijëve me së paku 80% dhe kjo kryesisht për shkak të emigrimit masiv, rënies së lindshmërisë dhe rritjes së vdekshmërisë për shkak të plakjes së shpejtë të popullsisë.
Fakti që të gjitha partitë politike pa përjashtim janë duke promovuar masivisht analfabetë funksionalë nëpër struktura partiake duke i kapur dhe mbyllur ato para çfarëdo fryme të re, e tregon më së miri se pse në zgjedhjet e fundit parlamentare fituan për deputetë/e shumë analfabetë dhe njerëz të padëshmuar në vend të profesorëve universitarë apo profesionistëve të dëshmuar. Kjo trajektore rëniejeje cilësie parlamentare po vazhdon që nga viti 2001, ndërkohë që në 6 apo 7 vitet e fundit vetëm sa është intensifikuar dhe po thellohet edhe më tej.
Partitë tona politike pa përjashtim janë bërë çerdhe pasurimi financiar brenda 24 orësh përmes ‘lidhjes së shkurtër’, ndaj kjo po vret çfarëdo perspektive kapitali njerëzor për ditë më të mira. Të gjitha partitë politike sa ishin në opozitë premtonin “zero” (korrupsion, punësime familjare apo militantësh), por sapo vinin në pushtet ndeznin motorët e korrupsionit deri në fyt. Rasti më i freskët është i pushtetit aktual, i cili në më pak se 4 vite qeverisje u kalb në korrupsion e krim të organizuar më shpejtë sesa çdo pushtet tjetër.
Dhe duke qenë se partitë politike pa përjashtim kanë bërë pasuri qindra euromilionëshe nëse jo edhe euromiliardëshe, ato e kanë ngulfatur çfarëdo debati publik për frymë të re politike. E duke e parë këtë gjendje të pashpresë rinia dhe profesionistët janë duke bërë të pamundurën për të ikur sa më shpejtë nga kjo tokë e larë sa e sa herë me gjak e sakrifica të papara, ku analfabetët funksionalë dominojnë politikën, ekonominë dhe çdo zhvillim tjetër social.
Prandaj, mos u çuditni me shpërthimin e pakënaqësive brenda LDK-së, sepse pakënaqësi të ngjashme kanë të gjitha partitë politike pa përjashtim. Capcarraphanja e votave brendapartiake është emërues i përbashkët i të gjitha partive politike pa përjashtim, ndaj këtu s’ka vend për kurrfarë krekosje nga askush. Ndërkohë që Serbia e Rusia po bëjnë dasëm për këtë vetëshpopullim të Kosovës duke thënë: “ja shikoni këta, në kohën kur s’kishin shtet, s’kemi mundur as me topa e tankse t’i dëbonim nga trojet e tyre, ndërsa tash që kanë shtetin e tyre po i braktisin vetë trojet e tyre edhe atë si asnjëherë më parë.”