Granit Havolli nga grupi muzikor Hawolf ka qenë i ftuar këtë të shtunë në emisionin “Pa Titull” në TV Arbëria me Dan Ahmetin.
Havolli ka treguar se çfarë domethënie ka emri i grupit “Hawolf”.
“Grupi Hawolf jemi katër vëllezër, mbiemrin e kemi Havolli dhe dikush prej shokëve të Yllit, të vëllait të madh, e thirrke ‘Hawolf, Hawolf’. Edhe kur ia kemi nisur me bërë muzikë, nuk dinim si t’ia lëmë emrin grupit, dhe ia lamë Hawolf.”
Granit Havolli ka dhënë detaje për albumin e ri që pritet të dalë shumë shpejt nga ky grup, i cili titullohet “Rrajt’ e Andrrave”.
“Albumi që do të dalë tani ka emrin ‘Rrajt’ e Andrrave’, ka baladë, sikur kënga ‘Bukë e Kryp’ që sapo ka dalë,” ka thënë ai.
Gjithashtu, ai flet edhe për mesazhet pozitive që ka marrë pas publikimit të këngës më të re “BUKË E KRYP”.
“Kënga është pritur shumë mirë, nuk ka kaluar as dy-tre javë që ka dalë, dhe ka tejkaluar pak edhe ato pritje që kemi pasur. Komentet dhe kritikat e mira që kemi marrë prej njerëzve janë të gjitha pozitive. Gjithçka ka shkuar shumë mirë”, ka thënë ai në “Pa Titull”