Sekretari amerikan i shtetit, Antony Blinken, ka thënë se SHBA-të e kundërshtojnë plotësisht idenë që Izraeli të pushtojë përgjithmonë Gazën dhe tha se qeveria e Benjamin Netanyahu ka një mundësi për ta kthyer fushatën e saj ushtarake kundër Hamasit në “një sukses të qëndrueshëm strategjik”.
Duke folur me gazetarët gjatë rrugës së tij nga Tel Avivi në Riad në fazën tjetër të vizitës së tij në Lindjen e Mesme, Reuters raporton se Blinken i kërkoi Izraelit të mërkurën të përdorte mundësinë e krijuar nga suksesi i tij në çmontimin e kapacitetit të Hamasit në Gaza dhe vdekja e liderit të Hamasit, Jahya Sinëar për të arritur një zgjidhje afatgjatë në konflikt.
“Tani është koha për t’i kthyer ato suksese në një sukses strategjik të qëndrueshëm. Dhe me të vërtetë kanë mbetur dy gjëra për të bërë, t’i ktheni pengjet në shtëpi dhe t’i jepni fund luftës me një kuptim të asaj që do të pasojë”, ka thënë Blinken.
Blinken tha se ai besonte se Izraeli kishte bërë progres në dërgimin e ndihmave humanitare në Gaza, por se nevojitej më shumë dhe diplomati i lartë amerikan shtoi se vendi i tij po punon për të kuptuar qartë se çfarë planifikon Izraeli për qeverisjen e Gazës në të ardhmen. Ai tha se është e nevojshme që të ketë plane konkrete për rrugën përpara, shkruan The Guardian, transmeton Gazeta Express.
Blinken tha gjithashtu se përgjigjja e pritshme e Izraelit ndaj sulmit raketor të Iranit më 1 tetor ndaj vendit duhej të bëhej në një mënyrë që të mos krijonte përshkallëzim më të madh. Në fillim të kësaj jave, FBI nisi një hetim për lëshimin e paautorizuar të dokumenteve të klasifikuara që përshkruan përgatitjen e Izraelit për një sulm të mundshëm hakmarrës ndaj Iranit.
Teherani tha se filloi sulmin e tij më 1 tetor si hakmarrje për një seri sulmesh kundër Iranit dhe milicive që ai mbështet në të gjithë Lindjen e Mesme, duke përfshirë Hezbollahun dhe vrasjen nga Izraeli të liderit të Hezbollahut, Hassan Nasrallah në Bejrut.