Sekretari amerikan i Shtetit, Antony Blinken, bëri aludimin e tij më të fortë deri më tani se Shtëpia e Bardhë është gati të heqë kufizimet e saj në Ukrainë duke përdorur armë me rreze të gjatë të furnizuara nga perëndimi në objektivat kryesore ushtarake brenda Rusisë.
Duke folur në Kiev së bashku me sekretarin e jashtëm të Mbretërisë së Bashkuar, David Lammy, Blinken tha se SHBA “që nga dita e parë ishte e gatshme të përshtaste politikën e saj ndërsa situata në fushën e betejës në Ukrainë ndryshonte. Ne do të vazhdojmë ta bëjmë këtë”, theksoi ai, duke i qëndruar asaj që sugjeroi edhe presidenti Biden një ditë më parë.
Blinken tha se ai dhe Lammy do t’u raportojnë “shefave” të tyre; Joe Biden dhe Keir Starmer, pas bisedimeve të tyre të mërkurën me presidentin ukrainas, Volodymyr Zelensky.
Sekretari i Jashtëm britanik sugjeroi se dërgimi i raketave balistike nga Irani në Moskë e zbuluar këtë javë, kishte ndryshuar mendimin strategjik në Londër dhe Uashington.
Ishte një “përshkallëzim i rëndësishëm dhe i rrezikshëm”, tha ai.
“Shkallëzimi këtu është Putin. Putini është përshkallëzuar me dërgesën e raketave nga Irani. Ne shohim një bosht të ri të Rusisë, Iranit dhe Koresë së Veriut”, shtoi Lammy.
Burimet e qeverisë britanike treguan se tashmë ishte marrë një vendim për të lejuar Ukrainën të përdorë raketa lundrimi Storm Shadow në objektivat brenda Rusisë, megjithëse nuk pritet të bëhet publike të premten kur Starmer takohet me Biden në Uashington DC.
Të dy udhëheqësit po planifikojnë të diskutojnë luftën në Ukrainë dhe mënyrën se si mund të përfundojë ajo, si pjesë e një diskutimi të gjerë të politikës së jashtme, megjithëse ata do të shmangin një fokus intensiv në çdo sistem individual të armëve, pasi qëllimi i bisedës është strategjik.