Presidenti amerikan Joe Biden ka thënë se nuk mbështet asnjë sulm të mundshëm hakmarrës izraelit ndaj vendeve bërthamore iraniane, pasi Irani lëshoi rreth 180 raketa në Izrael.
Tensionet janë të larta midis Iranit dhe Izraelit pas sulmit iranian të martën, për të cilin Izraeli tha se u zmbraps kryesisht nga sistemi i tij i mbrojtjes raketore, transmeton Telegrafi.
Irani tha se breshëria ishte një përgjigje ndaj vrasjeve të liderit politik të Hamasit, Ismail Haniyeh, liderit të Hezbollahut, Hassan Nasrallah dhe komandantit të Korpusit të Gardës Revolucionare iraniane, gjeneral brigade Abbas Nilforoushan.
Sulmi i tij erdhi gjithashtu pasi Izraeli njoftoi një sulm tokësor në Liban, në një përpjekje për të shkatërruar atë që ai e quajti “infrastrukturën terroriste” të Hezbollahut të mbështetur nga Irani në fshatrat kufitare.
SHBA ka bërë thirrje në mënyrë të përsëritur për de-përshkallëzimin dhe gjithashtu ka udhëhequr negociatat e gjata për një armëpushim midis Izraelit dhe grupit të armatosur palestinez Hamas në Gaza, por deri më tani pa sukses.
Komenti i Biden për gazetarët të mërkurën erdhi gjatë një udhëtimi, për të vizituar dëmet nga uragani në Karolinën e Veriut me zëvendëspresidenten Kamala Harris.
“A do të mbështesnit një sulm ndaj vendeve bërthamore të Iranit nga Izraeli”, u pyet Biden nga një gazetar.
“Përgjigjja është jo”, u përgjigj ai, duke shtuar se SHBA “do të diskutojë me izraelitët se çfarë do të bëjnë”.